قازاقستان وكپەنى جاساندى جەلدەتۋ اپپاراتىن تۇركيا جانە قىتايمەن بىرلەسىپ شىعارماق
بۇل تۋرالى بۇگىن ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.
«دەنساۋلىق ساقتاۋ مينيسترلىگىنىڭ اقپاراتى بويىنشا، 6 ايدا وكپەنى جاساندى جەلدەتۋ اپپاراتتارىنا قاجەتتىلىك 132 دانانى قۇرايدى. «كوكشەتاۋ-4پ» موبيلدىك اپپاراتتارى «تىنىس» اكتسيونەرلىك قوعامى بازاسىندا وندىرىلەدى. بۇگىندە 380 بىرلىك وكپەنى جاساندى جەلدەتۋ اپپاراتى شىعارىلدى. ونىڭ ىشىندە 164 بىرلىك جونەلتۋگە دايىن، 216 بىرلىك زاۋىت سىناقتارىنان وتۋدە. قالعان 200 بىرلىك وسى جىلدىڭ شىلدە ايىنىڭ سوڭىنا دەيىن تاپسىرىلادى. ستاتسيونارلىق اپپاراتتاردى قوسىمشا شىعارۋ ماقساتىندا تۇرىك جانە قىتاي سەرىكتەستەرىمەن ءوندىرىستى يگەرۋ جۇرگىزىلۋدە»، - دەدى مينيستر.
ونىڭ اتاپ وتۋىنشە، «بارك تەحنولودجي» جاۋاپكەرشىلىگى شەكتەۋلى سەرىكتەستىگى قازاقستاندىق جوعارى تەحنولوگيالىق جوبا ازىرلەۋدە.
«وسى جىلدىڭ شىلدە ايىنىڭ سوڭىنا دەيىن كومپانيا ءوز ازىرلەمەلەرىن اياقتايدى جانە اقىسىز نەگىزدە ق ر دەنساۋلىق ساقتاۋ مينيسترلىگىنە تەستىلەۋ ءۇشىن 20 اپپارات بەرەدى. قالعان 112 بىرلىك وسى جىلدىڭ تامىز-قىركۇيەك ايلارىندا شىعارىلادى. ايتا كەتۋ كەرەك، «قازمەدقۇرىلعى» جاۋاپكەرشىلىگى شەكتەۋلى سەرىكتەستىگى، «ورالمەدوڭىر» جاۋاپكەرشىلىگى شەكتەۋلى سەرىكتەستىگى وكپەنى جاساندى جەلدەتۋ اپپاراتتارىن شىعارۋعا بارلىق تەحنيكالىق بازاسى بار جانە ولار قاجەتتى ءونىم شىعارۋعا دايىن»، - دەدى بەيبىت اتامقۇلوۆ.
وسى رەتتە ول فارماتسيەۆتيكالىق سالاداعى مەملەكەتتىك قولداۋ شارالارىنىڭ ءبىرى تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا ۇزاق مەرزىمدى شارتتار جاساسۋ ەكەندىگىن باسا ايتتى.
«سونداي-اق وتاندىق تاۋار وندىرۋشىلەردى قولداۋ ماقساتىندا جەرگىلىكتى اتقارۋشى ورگانداردى وتاندىق كاسىپورىنداردىڭ ونىمدەرىنە باسا نازار اۋدارۋدى سۇرايمىز. بۇل ءبىزدىڭ كاسىپورىندارعا وندىرىستىك قۋاتتاردى ارتتىرۋعا جانە جاڭا وندىرىستەردى ىسكە قوسۋعا سەرپىن بەرەدى» ، — دەدى مينيستر.