كوروناۆيرۋس جۇقتىرعان ناۋقاستار قانداي جاعدايدا اۋرۋحاناعا جاتقىزىلادى
«كۆي جاعدايى راستالعان پاتسيەنتتەردى ەمدەۋگە جاتقىزۋ جانە باقىلاۋ الگوريتمىنە جەكە توقتالعىم كەلەدى. تالداۋلارى وڭ ناتيجە كورسەتكەندە جانە اۋرۋدىڭ ەشقانداي بەلگىسى بولماعان جاعدايدا تىركەلگەن جەرى بويىنشا ەمحاناعا، ۇيدەن شىقپاي- اق قوڭىراۋ شالۋ نەمەسە Сall -ورتالىعىنا 3000-103 نومىرىنە جۇگىنۋى قاجەت. امبۋلاتوريالىق جاعدايداعى باقىلاۋدى مساك موبيلدى بريگادالارى كەلەسى الگوريتمگە سايكەس جۇرگىزەدى: كۇن سايىن ەكى رەت تەلەفونمەن حابارلاسۋ؛ جالپى جاي- كۇيىن، دەنە قىزۋىن باعالاۋ، سىرقاتتانۋ بويىنشا شاعىمدارىن (جوتەلۋ، تىنىس الۋدىڭ قيىنداۋى، السىزدىك، تەرشەڭدىك، ديارەيا، بورتپە، ميالگيا جانە تاعى باسقا) انىقتاۋ، ساتۋراتسيا (مۇمكىن بولعاندا)؛ قاجەت بولعان جاعدايدا ءۇش كۇندە ءبىر رەت بەينە- كونسۋلتاتسيا جۇرگىزۋ»، - دەپ ءتۇسىندىردى كامالجان نادىروۆ.
سونىمەن قاتار، ول اۋرۋدىڭ سيمپتومسىز ءتۇرى بار ادامداردى مەديتسينالىق باقىلاۋ وقشاۋلاۋدىڭ 10- كۇنىندە پتر تەكسەرۋىمەن بوساتىلاتىنىن ايتتى.
«باقىلاۋ كەزەڭىندە كلينيكالىق سيمپتومدارىنىڭ (دەنە قىزۋىنىڭ كوتەرىلۋى، جوتەل، تىنىس الۋدىڭ قيىنداۋى، ەنتىگۋ) دامۋى كەزىندە پاتسيەنت جۇقپالى اۋرۋلار ستاتسيونارىنا جىبەرىلەدى. ەمدەۋگە جاتقىزۋعا COVID-19 دياگنوزى راستالعان، ەگەر ولاردىڭ تەمپەراتۋراسى 3 كۇن ىشىندە 38,5 بولسا، ساتۋراتسيا (قاننىڭ وتتەگىمەن قانىعۋى) 95 پايىزدان از بولسا، ەكى وكپەسىندە دە 25 پايىزدان استام وزگەرىستەرى تارالعان پنيەۆمونيا بەلگىلەرى بار (ك ت ناتيجەلەرى بولعان جاعدايدا) پاتسيەنتتەر جاتادى»، - دەدى ول.
ونىڭ ايتۋىنشا، COVID-19 ۆيرۋسى انىقتالعان، جاتاقحانادا، ادامدار كوپ قونىستانعان پاتەردە تۇراتىن نەمەسە 65 جاستان اسقان تاۋەكەل توبىنا كىرەتىن ادامدار دا اۋرۋحاناعا جاتقىزىلۋى ءتيىس.
«تاعى دا اۋرۋحاناعا جاتقىزۋ الگوريتمىنە نازار اۋدارعىم كەلەدى. ەگەر سىزدە تەستىنىڭ وڭ ناتيجەسى بولسا، ءبىراق سيمپتومدار بولماسا، جەدەل جاردەم شاقىرۋدىڭ قاجەتى جوق. سىزگە ەمحاناعا نەمەسە 3000103 ءنومىرى بويىنشا Call - ورتالىققا حابارلاسۋ قاجەت. ءسىزدىڭ اۋرۋحاناعا جاتقىزۋ ماسەلەڭىز ەمحانا دەڭگەيىندە شەشىلەتىن بولادى. وسى جاعدايدى پايدالانا وتىرىپ، حالىققا جەكە كارانتيندىك شارالاردى قاتاڭ ساقتاۋعا جانە مامانداردىڭ ۇسىنىستارىن باستى نازارعا الۋعا شاقىرامىن»، - دەپ قورتىندىلادى ك. نادىروۆ.
اۆتور: الما مۇقانوۆا