تاجىريبەسى بار مامانداردى ستۋدەنتتەرگە ءدارىس بەرۋگە تارتۋعا بولادى

نۇر- سۇلتان. قازاقپارات - تاجىريبەلى ماماندار ستۋدەنتتەرگە ءدارىس بەرە الاتىن بولدى. بۇل تۋرالى ق ر ب ع م ءبىلىم جانە عىلىم سالاسىنداعى باقىلاۋ كوميتەتىنىڭ ءتورايىمى گۇلزات كوبەنوۆا ايتتى، دەپ حابارلايدى قازاقپارات ءتىلشىسى.

«قازىرگى ۋاقىتتا مينيسترلىك 17 جوعارى وقۋ ورنىنا جوسپاردان تىس تەكسەرۋدى باستادى جانە جىل سوڭىنا دەيىن تەكسەرۋلەردى جوسپارلى تۇردە جۇرگىزەتىن بولادى. ارينە، بۇل جەردەگى ەڭ باستى ماسەلە، ج و و- لاردىڭ ءبىلىم بەرۋ باعدارلامالارىن ساپالى دايىنداۋىنا بايلانىستى. سول ءبىلىم بەرۋ باعدارلاماسىن اياقتاپ شىققاننان كەيىن «تۇلەك قانشالىقتى جۇمىسقا ورنالاسادى؟»، «قانشالىقتى سۇرانىسقا يە بولادى؟»، وسىعان وراي 5 - ماۋسىمدا ج و و- لارعا قويىلاتىن بىلىكتىلىك تالاپتارىنا وزگەرىستەر ەنگىزىلدى.

كادرلاردى دايىنداۋعا ليسەنزيا الۋ ءۇشىن ج و و- نىڭ باعدارلامالارى ساراپتامادان ءوتۋى كەرەك جانە ءبىلىم مينيسترلىگىنىڭ وقۋ باعدارلامالارى تىزىمىندە بولۋى ءتيىس»، - دەدى گۇلزات كوبەنوۆا مينيسترلىكتىڭ Facebook-پاراقشاسىندا وتكەن ونلاين- بريفينگ بارىسىندا.

سونىمەن قاتار كوميتەت ءتورايىمى جوعارى وقۋ ورىندارىنىڭ پروفەسسور- وقىتۋشى قۇرامىنا قويىلاتىن تالاپتاردىڭ دا وزگەرگەندىگىن ايتتى. «ەندىگى ۋاقىتتا ج و و وقۋ بارىسىنا تاجىريبەلى مامانداردى تارتا الادى. مىسالى، بۇرىنعى جىلدارى ج و و- لاردا عىلىمي دارەجەلەرى بار وقىتۋشىلار 50 پايىزدى قۇراۋى قاجەت بولسا، بيىلدان باستاپ 40 پايىزعا تومەندەتىلدى. نەگىزگى شتاتتاعى پروفەسسور- وقىتۋشى قۇرامى بۇرناعى جىلى 80 پايىزدى قۇراسا، وتكەن جىلى 60 پايىز بولدى. ەندىگى ۋاقىتتا ۇلتتىق بىلىكتىلىك شەڭبەرى اياسىندا تاجىريبەسى مول مامانداردى تارتۋعا بولادى»، - دەدى ول.

اۆتور: مارلان جيەمباي