قىزىلوردا قالاسىندا كارانتين رەجيمىنە وزگەرىستەر ەنگىزىلدى
بۇل وزگەرىس تۇرعىندار اراسىندا كورونوۆيرۋس ينفەكسياسىنىڭ الدىن الۋ جونىندەگى شارالاردى ودان ءارى كۇشەيتۋ ماقساتىندا قولعا الىندى. وسى باعىتتا قىزىلوردا قالاسى باس مەملەكەتتىك سانيتار دارىگەرىنىڭ قاۋلىسى كۇشىنە ەندى.
قىزىلوردا قالاسى اكىمدىگىنىڭ حابارلاۋىنشا، وبلىس ورتالىعىندا كورونوۆيرۋس ينفەكسياسىنىڭ ناقتىلانعان جاعدايى 7 پايىزعا وسكەن. وسىعان بايلانىستى قالا اۋماعىندا ينفەكسيانى شوعىرلاندىرۋ جانە تارالۋىنا جول بەرمەۋ ماقساتىندا شەكتەۋ شارالارى ەنگىزىلدى.
ول ەپيدەميولوگيالىق جاعداي تۇراقتانعانعا دەيىن جالعاسادى. ەندى كوپشىلىك مەرەكەلىك ءىس-شارالار، ۇجىمدىق، وتباسىلىق جيىندارعا تىيىم سالىنادى. ال كومپيۋتەرلىك كلۋبتار، بۋكمەكەرلىك جانە لوتو، موتو-كونتورالاردىڭ جۇمىسى كۇشەيتىلگەن سانيتاريالىق- دەزينفەكتسيالىق رەجيممەن ساعات 08.00 دەن 20.00 گە دەيىن شەكتەلەدى.
ول بۇرىن 23.00 گە دەيىن بولاتىن. كينوتەاترلار، تۇنگى كلۋبتار، ساۋدا ويىن- ساۋىق ورتالىقتارى جانىنداعى بالالار ويىن الاڭدارى قىزمەتىن توقتاتا تۇرادى.
«بالالارعا ارنالعان جازعى تىنىعۋ، ساۋىقتىرۋ لاگەرلەرى، مەكتەپ جانىنداعى كۇندىزگى لاگەرلەردىڭ جۇمىس جاساۋىنا تىيىم سالىنادى. سونداي-اق، وقۋشىلار جانە مەكتەپ جاسىنا دەيىنگى بالالاردىڭ ەكسكۋرسياسىن وتكىزۋگە بولمايدى. قالالىق دەمالىس پاركى ءوز جۇمىسىن سانيتارلىق- دەزينفەكتسيالىق نورمالاردى قاتاڭ ساقتاي وتىرىپ جالعاسادى. سونىمەن قاتار، بارلىق مەملەكەتتىك ورگاندار، مەكەمەلەر، ۇيىمدار، كاسىپورىندار شتات كەستەسىندە 30 دان استام قىزمەتكەر بولعان جاعدايدا 50 پايىز قاشىقتان جۇمىس جاساۋ نىسانىندا قالادى. قىزىلوردا قالاسىندا كوروناۆيرۋس ينفەكتسياسىنا بايلانىستى قالىپتاسقان جاعداي قاتاڭ باقىلاۋدا»، - دەپ ءمالىم ەتتى قىزىلوردا قالاسىنىڭ اكىمدىگى.
جوعارىدا اتالعان تالاپتاردىڭ ساقتالۋىن باقىلاۋ ماقساتىندا قالا اكىمدىگى جانىنان ءموبيلدى توپ قۇرىلىپ، ءتيىستى جۇمىس جۇرگىزىلىپ جاتىر.
ەسكە سالا كەتەيىك، قىزىلوردا وبلىسىندا 80 جاستاعى قاريا كوروناۆيرۋس جۇقتىرعان بولاتىن.