برەنت مۇنايىنىڭ باعاسى وسۋدە

نۇر-سۇلتان. قازاقپارات - الەمدىك بيرجادا Brent ماركالى مۇنايدىڭ باعاسى 6-ناۋرىزدان بەرى ءبىرىنشى رەت 43 دوللاردان استى، دەپ حابارلايدى قازاقپارات.

بيىلعى تامىز ايىندا جەتكىزىلەتىن Brent ماركالى مۇناي فيۋچەرستەرىنىڭ باعاسى لوندوننىڭ ICE بيرجاسىندا %1,7 ءوسىپ، باررەلى 43,02 دوللارعا جەتتى. ساۋدا الاڭىنىڭ سوڭعى مالىمەتتەرىندە وسىلاي دەلىنگەن.

مۇنايدىڭ بۇل ءتۇرىنىڭ قۇنى سوڭعى رەت 6-ناۋرىزدا 43 دوللاردان جوعارى بولعان ەدى. ودان كەيىن كۇرت قۇلدىراپ كەتتى. ال WTI ماركالى مۇنايدىڭ باررەلى 40,22 دوللار دەڭگەيىندە تۇر. بۇل - وتكەن ساۋدا كەزىندەگى باعادان 1,7 پايىز جوعارى. وپەك+ مينيسترلەرى 6-ماۋسىمداعى كەڭەستە تاعى ءبىر اي بويى، ياعني شىلدەنىڭ سوڭىنا دەيىن مۇناي ءوندىرۋدى ازايتۋ جونىندە كەلىسكەن بولاتىن. بۇل - مۇناي ءوندىرىسى تاريحىنداعى ەڭ اۋقىمدى تومەندەتۋ بولىپ وتىر.