وپەرا ءانشىسى قىزىلوردا وبلىسى اكىمىنىڭ كەڭەسشىسى بولدى
10:45, 01 - ماۋسىم 2020
نۇر-سۇلتان. قازاقپارات - وپەرا ءانشىسى سۇندەت بايعوجين قىزىلوردا وبلىسى اكىمى گۇلشارا ءابدىقالىقوۆانىڭ مادەنيەت سالاسى بويىنشا شتاتتان تىس كەڭەسشىسى قىزمەتىنە تاعايىندالدى، - دەپ حابارلايدى اكىمدىكتىڭ باسپا ءسوز قىزمەتى.
سۇندەت ابدراحمان ۇلى بايعوجين 1984 -جىلى قوستاناي وبلىسى، ارقالىق قالاسىندا دۇنيەگە كەلگەن. قازاق ۇلتتىق مۋزىكا اكادەمياسىندا «جەكە ءان ايتۋ» ماماندىعى بويىنشا ءبىلىم الدى. «استانا وپەرا» تەاترىنىڭ جەتەكشى وپەرا ءانشىسى قىزمەتىن اتقاردى. ق ر پرەزيدەنتىنىڭ جارلىعىمەن «قۇرمەت» وردەنىمەن ماراپاتتالعان. ق ر ەڭبەك سىڭىرگەن قايراتكەرى.
وپەرا مايتالمانى سىر ەلىنىڭ ونەرىن، ونىڭ ىشىندە كلاسسيكالىق مۋزىكانى دامىتۋعا ات سالىسادى. ايماق ونەرپازدارىن بەلگىلى وپەرا جۇلدىزدارىمەن تاجىريبە الماستىرىپ، جاھاندىق ساحناعا شىعارۋعا ەڭبەك ەتەدى دەپ جوسپارلانعان.