ا ق ش- تا افروامەريكالىقتىڭ ءولىمى ءۇشىن مىڭداعان ادام پوليتسيامەن قاقتىعىستى
13:03, 28 - مامىر 2020
نۇر-سۇلتان. قازاقپارات - ا ق ش- تىڭ ميننەاپوليس قالاسىندا افروامەريكالىق دجوردج فلويدتىڭ ولىمىنەن كەيىن نارازىلىق شەرۋى ءوتتى، دەپ حابارلايدى «حابار 24».
مىڭداعان كىسى كوشەگە شىعىپ، «قارا ءناسىلدى ادامداردى ءولتىرۋدى توقتاتىڭدار»، «مەن دەم الا الماي جاتىرمىن» دەگەن ءۇنپاراقشالار ۇستاپ، بيلىكتەن پوليتسيانىڭ قاتىگەزدىگىن توقتاتۋدى سۇرادى. بەيبىت باستالعان شەرۋدىڭ سوڭى قاقتىعىسقا ۇلاسىپ، پوليتسيا شەرۋشىلەرگە كۇش قولداندى. ەسكە سالا كەتەيىك، حالىقتىڭ اشۋىن تۋدىرعان وقيعا بىرنەشە كۇن بۇرىن بولعان. پوليتسيا جالعان قۇجات جاساعان دەگەن كۇدىكپەن فلويدتى ۇستاۋ كەزىندە كۇش قولدانىپ، جازاتايىم ەتكەنى بەينەجازباعا جازىلىپ، الەۋمەتتىك جەلى ارقىلى تاراپ كەتەدى. ىسكە قاتىستى تەرگەۋ ءجۇرىپ جاتىر.