ەۋرازيا ۇلتتىق ۋنيۆەرسيتەتىندە جاڭا جاتاقحانا قۇرىلىسى باستالدى

نۇر- سۇلتان. قازاقپارات - نۇر- سۇلتاندا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىنە ارنالعان جاڭا جاتاقحانا سالىنا باستادى، دەپ حابارلايدى قازاقپارات.

بۇل تۋرالى ەۇۋ رەكتورى ەرلان سىدىقوۆ سىبايلاس جەمقورلىققا قارسى قىزمەتتىڭ ANTIKOR ورتالىعىندا ايتىپ بەردى.

«جاتاقحانا ماسەلەسى - قازاقستاندا عانا ەمەس، كوپتەگەن ەلدەردە وزەكتى بولىپ وتىر. ستۋدەنت سانى ارتىپ كەلە جاتىر، ال ۇلكەن قالاداعى ۋنيۆەرسيتەتتەرگە جەر جەتپەيدى. ءۇش جىل بۇرىن تۇڭعىش پرەزيدەنت - ەلباسى رەسپۋبليكا بويىنشا 75 مىڭ ورىندىق جاتاقحانا سالۋدى تاپسىردى. وسى ورايدا ءبىلىم جانە عىلىم مينيسترلىگى ۇلكەن جوبا جاساپ، جاتاقحانالار سالىنا باستادى. ارينە، بۇل جەردە مەملەكەتتىك قاراجاتتىڭ از ەكەنىن، ۋنيۆەرسيتەتتەردە اقشانىڭ از ەكەنىن ايتۋىمىز كەرەك. وسى تۇرعىدا ءبىزدىڭ مينيسترلىك قارجى ورتالىعىن اشىپ، ينۆەستورلارعا جاقسى جاعداي جاساپ بەردى. سودان كەيىن ينۆەستورلار كەلىپ جاتىر»، - دەدى ەرلان سىدىقوۆ.

رەكتوردىڭ ايتۋىنشا، وتكەن اپتادا ە ۇ ۋ ستۋدەنتەرى ءۇشىن 2,5-3 مىڭ ورىندىق جاتاقحانا قۇرىلىسى باستالدى.

«بۇل - مەملەكەتتىڭ دە، ۋنيۆەرسيتەتتىڭ دە اقشاسى ەمەس، ينۆەستورلار قاراجاتىنا سالىنادى. مۇندا 5-6 جاتاقحانا عيماراتى بولەك قالاشىق بولىپ تۇرادى. قازاقستاندا العاش رەت ينۆەستورلار كومەگىمەن جاتاقحانا ماسەلەسىن شەشكەلى وتىرمىز»، - دەدى ە. سىدىقوۆ.

سونىمەن بىرگە، ە. سىدىقوۆ جەمقورلىق قاۋىپتى ازايتۋ ءۇشىن جاتاقحانادان ورىن الۋ پروتسەسىنىڭ ونلاين جۇرگىزىلەتىنىن ايتتى.

«ستۋدەنتتەر جاتاقحانادان ورىن الۋ ءوتىنىشىن ينتەرنەت ارقىلى جىبەرەدى. جىل بويى جاتاقحانادا تۇرعان ستۋدەنتتىڭ ءتارتىپ بۇزعانى انىقتالسا، كەلەسى جىلعا ءوتىنىشى اۆتوماتتى تۇردە قابىلدانبايدى»، - دەدى ەۇۋ رەكتورى.

اۆتور: ايجان سەرىكجان قىزى