قازاقستان يرانمەن قۇقىقتىق سالاداعى ارىپتەستىكتى كۇشەيتپەك
«قازاقستان رەسپۋبليكاسى مەن يران يسلام رەسپۋبلكيكاسى اراسىندا ازاماتتىق ىستەر بويىنشا ءوزارا قۇقىقتىق كومەك تۋرالى كەلىسىمدى بەكىتۋدەگى ماقسات - ەكى ەل اراسىنداعى قۇقىقتىق سالاداعى ارىپتەستىكتى كۇشەيتۋ. كەلىسىمدى راتيفيكاتسيالاۋ ارقىلى ازاماتتىق سوت ءوندىرىسى سالاسىندا ازاماتتارىمىزعا قۇقىقتىق كومەك بەرۋ سالاسىنا جاڭا سەرپىن بەرىلگەلى وتىر. بۇل كەلىسىمدى راتيفيكاتسيالاۋ قازاقستان رەسپۋبليكاسى مەن يران يسلام رەسپۋبليكاسى اراسىنداعى قۇقىقتىق ماسەلەلەر بويىنشا ەكىجاقتى ىنتىماقتاستىقتى نىعايتۋعا ىقپال ەتەتىن بولادى»، - دەدى ادىلەت ۆيتسە-ءمينيسترى ناتاليا پان زاڭ جوباسىن پارلامەنت ماجىلىسىندە تانىستىرا وتىرىپ.
كەلىسىمدە ەكى ەلدىڭ قۇزىرەتتى ورگاندارىنىڭ ازاماتتىق ىستەر بويىنشا ءوزارا قۇقىقتىق كومەك كورسەتۋ ماسەلەلەرى جونىندەگى ءوزارا ءىس-قيمىل ماسەلەلەرى رەگلامەنتتەلەدى. قۇجاتتا كومەك كورسەتۋدەن باس تارتۋ نەگىزدەرى، قۇقىقتىق اقپاراتپەن جانە ماتەريالدارمەن الماسۋ، زاڭ اكتىلەرىن تانۋ جانە ورىنداۋ شارتتارى جان-جاقتى ايقىندالعان. سونداي-اق قۇجاتتاردى تاپسىرۋ شارتتارى، دالەلدەمەلەردى جيناۋ جانە بەرۋ، كۋاگەر مەن ساراپشىنى شاقىرۋ، سوت اكتىلەرى مەن تورەلىك شەشىمدەردى تانۋ جانە ورىنداۋ بەلگىلەنگەن. ەكى مەملەكەتتىڭ قۇقىقتىق كومەك كورسەتۋ راسىمدەرىندە تىكەلەي ءوزارا ءىس-قيمىل جاسايتىن قۇزىرەتتى ورگاندارى ايقىندالعان.