ولار كۇن سايىن كارانتين تالابىن بۇزۋعا ارەكەتتەنگەن تۇرعىنداردى توقتاتىپ، اۋرۋ وشاعى شىققان اۋلالار مەن پودەزدەردى، بلوكپوستتاردى كۇزەتەدى.
7- مامىر - وتان قورعاۋشى كۇنىنە وراي، قازاقپارات ۇلتتىق ۇلان ساربازدارىنىڭ كارانتيندە جاساعان ەرلىكتەرىنە شولۋ ۇسىنادى. الماتى قالاسىندا ۇلتتىق گۆارديا ساربازدارى كارانتيندە قوعامدىق ءتارتىپتى بۇزعان ماس ەر ادامدى ۇستادى.
ۇلتتىق گۆارديا اسكەريلەرى مەن پوليتسيا قىزمەتكەرىنىڭ بىرىككەن پاترۋلىنە ايەلدەر جۇگىنىپ، ىشىمدىككە ماس ەر ادامعا شاعىمدانعان. ءتارتىپ ساقشىلارى ونى سابىرعا شاقىرعانىمەن، ءتارتىپ بۇزۋشى ءوزىن دورەكى ۇستاعان. كوشەدەگى ادامداردى بالاعاتتاپ، اسكەريلەرگە قول كوتەرمەك بولعان.
بىرنەشە ەسكەرتۋدەن كەيىن اسكەري جاساق ءتارتىپ بۇزۋشىنى ارنايى قۇرالدارمەن توقتاتتى.
تەكسەرە كەلە، ۇستالعان ەر ادامنىڭ بۇرىن دا سوتتالعانى انىقتالدى. سوت قاراۋىنان كەيىن ەر ادام ق ر ا ق ب ك 476- جانە 478-باپتارى بويىنشا 35 تاۋلىككە قامالدى.
كاسىبيلىك تانىتقان 6654 ءبولىمىنىڭ اعا لەيتەنانتى نۇرسۇلتان راحىمباي مەن قاتارداعى جاۋىنگەر ناۋرىزبەك ىلياسوۆتى«وڭتۇستىك» وڭىرلىك قولباسشىلىعىنىڭ قولباسشىسى، گەنەرال-مايور تالاپكەر امرييەۆ ماراپاتتادى.
قازىرگى ۋاقىتتا الماتى قالاسىندا توتەنشە جاعداي رەجيمىن قامتاماسىز ەتۋگە ۇلتتىق گۆارديانىڭ 1100 اسكەري قىزمەتشىسى ۇلەس قوسىپ كەلەدى.
ال ەلوردالىق ساربازدار كارانتيندە جوعالعان بالانى تاۋىپ، اتا-اناسىنا تابىستادى. 14- ءساۋىر كۇنى ساعات 15.10 دا الماتى اۋدانىنىنىڭ ع. مۇسىرەپوۆ كوشەسىندە قوعامدىق ءتارتىپ پەن قاۋىپسىزدىكتى قاداعالاپ جۇرگەن اسكەري جاساققا ەر ازامات كومەك سۇراپ كەلدى.
ول شاعىنماركەتكە كىرىپ ازىق-تۇلىك العاندا، كولىكتە ۇيىقتاپ جاتقان 2 جاسار ۇلى كوشەگە شىعىپ كەتكەن.
اينالانى 10-15 مينۋتتاي قاراپ، ۇلىن ەش جەردەن تاپپاعان. جاساق باستىعى سەرجانت نۇرسۇلتان قۇراشيەۆ بالانىڭ جوعالعانىن اسكەري جاساق كەزەكشىسىنە بايانداپ، كورشى باعىتتاعى ارىپتەستەرىنە حابارلاعان جانە پاترۋل قاتارداعى ەرالى قوسىمباي مەن بەيبارىس قايىرلييەۆپەن بىرگە ىزدەۋ شارالارىنا كىرىسكەن. ۇلاندىقتار توڭىرەكتى تۇگەل قاراپ، جىلاپ تۇرعان كىشكەنتاي قايساردى تاۋىپ، اتا- اناسىنا تابىستادى.
جاڭاوزەن قالاسىندا ۇلتتىق گۆارديا ساربازدارى كوشەدە ەسىرتكى الىپ جۇرگەن ەر ادامدى ۇستادى. «وركەن» شاعىناۋدانىن كۇزەتۋدە پاترۋل باسشىسى، كىشى سەرجانت جانگەلدى بالماگانبەت پەن قاتارداعى جاۋىنگەرلەر بايتورە يتەنوۆ جانە ەراسىل مومباي ءوزىن كۇدىكتى ۇستاعان ەر ادامدى بايقاعان. ەر ادام جان- جاعىنا قاراپ، پاتۋرلدەن قاشۋعا تىرىسقان. اسكەري جاساق كۇدىكتىنى ۇستاپ، كۇرتەسىنىڭ قالتاسىنان ءبىر بۋما ەسىرتكى زاتىن (ماريحۋانا) تاپقان جانە ەر ادامدى پوليتسيا بولىمىنە تاپسىرعان.
قىزمەتتەگى قىراعىلىعى مەن جوعارى كاسىبيلىگى ءۇشىن اسكەري جاساقتى 5548 اسكەري ءبولىمىنىڭ كومانديرى ماراپاتتادى. سونىمەن بىرگە، ماڭعىستاۋلىق ساربازدار تاپانشادان وق اتقان ەر ادامدى ۇستادى. وقيعا پريمورسك اۋدانىنداعى «پەلە گريمم» كافەسىنىڭ جانىندا بولعان. ق
وعامدىق ءتارتىپ كۇزەتىندە پوليتسيا قىزمەتكەرىمەن بىرگە جۇرگەن اسكەري جاساق - ورىنبەك راحىمجان مەن باتىرجان باعىت ۇلى كافە ماڭىندا وق اتىلعانىن ەستىپ، جەدەل باسقارۋ ورتالىعىنا مالىمدەگەن. وقيعا ورنىنا جەتكەندە جاۋىنگەرلەر كۇدىكتى ءۇش ادامدى بايقايدى. باتىل قيمىلداپ، سولاردىڭ ءبىرىن قولعا تۇسىرەدى. ۇستالعان ەر ادامنان وق- دارىلەرىمەن قوسا «بايكال» پنيەۆماتيكالىق تاپانشاسى تابىلدى. وقيعا ورنىنا اقتاۋ قالاسى پوليتسيا باسقارماسىنىڭ جەدەل تەرگەۋ توبى شاقىرىلدى. تەرگەۋشىلەر 31 جاستاعى قالا تۇرعىنىنان تاپانشانى تاركىلەدى.
قازىرگى ۋاقىتتا قر قىلمىستىق كودەكسىنىڭ 287-بابىنا (قارۋدى، وق- دارىلەردى, جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ) سايكەس تەرگەۋ امالدارى ءجۇرىپ جاتىر. قىراعىلىعى مەن باتىل ءىس- ارەكەتى ءۇشىن اتالعان ساربازداردى اسكەري ءبولىم كومانديرى ماراپاتتادى.
قىزىلوردا قالاسىندا پاترۋلدىك پوليتسەي مەن اسكەريلەر كوپقاباتتى ۇيدەگى ءورتتى توقتاتىپ، ەس- ءتۇسسىز قالعان تۇتاس وتباسىن دالاعا الىپ شىقتى.
20- ءساۋىر كۇنى ساعات 16.30 دا پاترۋل باستىعى، پوليتسيا لەيتەنانتى ن. قايىربايەۆ ۇلتتىق ۇلان اسكەري قىزمەتشىلەرى كيريلل لوسيتسكيي جانە ءنيازالى داۋلەتپەن بىرگە پاترۋلدەۋ بارىسىندا تۇرعىن ۇيلەردىڭ بىرىنەن كوك ءتۇتىندى كورەدى.
بۇل تۋرالى 5547 اسكەري ءبولىمىنىڭ اسكەري قىزمەتشىلەرى كەزەكشىگە بايانداپ، مەديتسينا ماماندارى مەن ءورت سوندىرۋشىلەردى شاقىرعان جانە وزدەرى تۇرعىندارى قۇتقارۋعا كىرىسكەن. ولار كوپقاباتتى ءۇيدىڭ تۇرعىندارىنا ءورت تۋرالى حابارلاپ، باسپانادان شىعۋعا جاردەمدەسكەن.
وسى ۋاقىتتا تۇرعىنداردىڭ ءبىرى ءورت شىققان پاتەردە تۇتاس وتباسىنىڭ قالعانىن ايتادى. اسكەري جاساق ەسىكتى بۇزىپ، ۇيگە كىرگەندە ەس- ءتۇسسىز جاتقان ءتورت ادامدى تاپتى. وسىلايشا، پوليتسيا قىزمەتكەرى مەن ۇلتتىق ۇلان اسكەريلەرى بارلىق تۇرعىنداردى سىرتقا شىعارىپ، ولارعا العاشقى مەديتسينالىق كومەك كورسەتكەن. ءورت سوندىرۋشىلەرگە دە كومەك بەرىپ، ءتىلسىز جاۋدى بىرلەسىپ اۋىزدىقتادى. ەرلىك كورسەتكەن جاۋىنگەرلەر ۇلتتىق ۇلان باس قولباسشىسى، گەنەرال- لەيتەنانت رۋسلان جاقسىلىقوۆتىڭ بۇيرىعىمەن ماراپاتتالدى.
اسكەري مىندەتتەرىن ادال ورىنداعانى، باتىل جانە تاباندى ارەكەتى ءۇشىن جانە جوعارى كاسىبيلىگى ءۇشىن قاتارداعى ءنيازالى داۋلەت پەن كيريلل لوسيتسسكيگە «قوعامدىق ءتارتىپتى ساقتاعانى ءۇشىن» توسبەلگىسى تابىس ەتىلدى. 5547 اسكەري ءبولىمىنىڭ كومانديرى پودپولكوۆنيك تولەبي چۋبايەۆ جەكە قۇرام الدىندا جاۋىنگەرلەردى قۇتتىقتاپ، ماراپاتتارىن كەۋدەگە تاقتى. شىعىس قازاقستاندا كۋرچاتوۆ قالاسىنداعى 3514 اسكەري ءبولىمىنىڭ قىزمەتشىسى دۋمان بوعاسبايەۆ سۋيتسيد جاساماق بولعان ايەلدى قۇتقارىپ قالدى.
وقيعا 5 مامىر كۇنى ساعات 19:30 شاماسىندا بولعان. دۋمان بوعاسبايەۆ ءوز ءۇيىنىڭ بالكونىندا تۇرعان ساتتە قاراما- قارسى ەسكى تۇرعىن ءۇيدىڭ 4- قاباتىنان سەكىرۋگە وقتالعان ايەلدى بايقاعان. ۇلاندىق جاۋىنگەر وقيعا جايلى پوليتسيا بولىمىنە حابار بەرىپ، دەرەۋ كومەككە ۇمتىلادى. سارباز 4- قاباتقا كوتەرىلىپ، سەكىرۋگە دايىندالعان ايەلدى ىشكە تارتىپ كىرگىزىپ الادى.
«شىنىمدى ايتسام، بۇل جاعدايدا ايەلدى ۇگىتتەۋگە، قاتەلىك جاساماۋعا ءوتىنىپ تۇراتىنداي ۋاقىت بولعان جوق. ءوز ومىرىنە بالتا شاپپاي تۇرعاندا، شاپشاڭ قيمىلداپ، تەز قۇتقارىپ قالۋ كەرەك بولدى. ويتكەنى، بۇل وقيعادا ادام ومىرىنە قاۋىپ ءتونىپ تۇردى»، - دەيدى اعا سەرجانت دۋمان بوعاسبايەۆ.
وزىنە قول جۇمساماق بولعان ازاماتشانى قاۋىپسىز ورىنعا شىعارعان سوڭ، وقيعا ورنىنا پوليتسيا قىزمەتكەرلەرى جەتكەن. قازىرگى ۋاقىتتا قۇزىرلى ورگاندار ايەلدى سۋيتسيدكە نە يتەرمەلەگەنىن انىقتاپ جاتىر.