ساراپشى: الەم ەلدەرىندە دارىندى جاستار ءۇشىن كۇرەس كۇشەيەدى
ساراپشى ونلاين باسپا ءسوز ءماسليحاتى بارىسىندا ادامي كاپيتالدىڭ دامۋىنىڭ نەگىزگى باعىتتارىمەن تانىستىردى. ونىڭ پىكىرىنشە، سىرتقى ىقپال فاكتورلارى تۋرالى ايتقاندا، قازاقستاندىق ادامي كاپيتالعا جاھاندىق ەكى ترەند اسەر ەتەدى. ءبىرىنشى توپ - دارىندىلار ءۇشىن كۇرەس. دامۋشى ەلدەردەن «ءبىلىمدى جاستاردىڭ قونىس اۋدارۋى» كۇشەيەدى. ەكىنشى توپ ترەندى داعدىلاردىڭ ترانسفورماتسياسىنا بايلانىستى. ساۋاتتىلىق، قول ەڭبەگى مەن رەسمي ديپلوم جۇمىس پەن جاقسى تابىسقا ۋاقىت وتكەن سايىن كەپىل بولا المايدى.
«ءۇش بىلىكتىلىك توبىنا دەگەن سۇرانىس ەكپىندى تۇردە ءوسىپ كەلەدى. ولار: تەحنولوگيالىق بىلىكتىلىك، تەحنولوگيانى تۇسىنە ءبىلۋ، يننوۆاتسيانى دايارلاي ءبىلۋ جانە ءتيىمدى قولدانا ءبىلۋ بولسا، ەكىنشىسى قوعامدىق جانە ەموتسيالىق بىلىكتىلىك - كاسىپكەرلىك، كوشباسشىلىق، ىنتالىلىق، كوممۋنيكاتيۆتىك قابىلەتى، ءۇشىنشىسى جوعارى كوگنيتيۆتىك يكەمدىلىك - كرەاتيۆتىك، سىن تۇرعىسىنان ويلاۋ، قيىن اقپاراتتى وڭدەۋ ءبىلۋ»، - دەيدى ساراپشى قازاقستاندى مودەرنيزاتسيالاۋ جانە جۇيەلى رەفورمالاردى جۇرگىزۋ ماسەلەلەرى بويىنشا زەرتتەۋ جۇمىستارىن تانىستىرۋ كەزىندە.
ايتا كەتسەك، بۇگىنگى ونلاين باسپا ءسوز ءماسليحاتىندا الەمدىك ەكونوميكا جانە ساياسات ينستيتۋتىنىڭ ساراپشىلارى ەلدى جاڭعىرتۋ ماسەلەلەرى بويىنشا جۇرگىزىلگەن جۇيەلى ساراپتامالىق زەرتتەۋ ناتيجەلەرىن تانىستىرعان بولاتىن. عىلىمي جوبانىڭ باستى قورىتىندىلارى ونلاين- كورسەتىلىم بارىسىندا تانىستىرىلدى. اۋقىمدى زەرتتەۋ جۇمىسى ق ر تۇڭعىش پرەزيدەنتى - ەلباسى قورىنىڭ تاپسىرماسى بويىنشا 2019 -جىلى باستالعان.
اۆتور: ايان بەكەن ۇلى