«بۇگىن ءماجىلىستىڭ جالپى وتىرىسىندا 2019 -جىلدىڭ جەلتوقسانىندا وتكەن ۇلتتىق كەڭەستىڭ ەكىنشى وتىرىسىندا جاريالانعان پرەزيدەنتتىك ساياسي رەفورمالار توپتاما اياسىندا ازىرلەنگەن تاعى ءبىر ماڭىزدى زاڭ جوباسى قارالدى. اتاپ ايتقاندا، ماجىلىسمەندەر «ق ر پارلامەنتى جانە ونىڭ دەپۋتاتتارىنىڭ مارتەبەسى تۋرالى» ق ر كونستيتۋتسيالىق زاڭىنا تولىقتىرۋلار ەنگىزۋ تۋرالى» ق ر زاڭىنىڭ جوباسىن تالقىلادى.
اتالعان زاڭ جوباسىندا پارلامەنتتىك وپپوزيتسيا (ازشىلىق) ينستيتۋتىن ەنگىزۋ، سونىمەن قاتار پارلامەنتتىك ازشىلىق دەپۋتاتتارىنان پارلامەنت ءماجىلىسىنىڭ ءبىر تۇراقتى كوميتەتىنىڭ ءتوراعاسى جانە 2 حاتشىسى لاۋازىمىندا كانديداتۋرا ۇسىنۋ قۇقىعىنا كەپىلدىك بەرۋ كوزدەلگەن. بۇل ورايدا ەڭ ماڭىزدىسى، وپپوزيتسيا ۇسىنعان كانديداتۋراعا داۋىس بەرۋ وپپوزيتسيا وكىلدەرىنىڭ ءبىرى سايلانعانعا دەيىن جالعاساتىن بولادى. باسىمدىققا يە پارتيا وكىلى بۇل لاۋازىمعا سايلانا المايدى»، - دەپ جازدى ەرلان كارين Facebook پاراقشاسىندا.
ونىڭ اتاپ وتۋىنشە، جاڭا نورمالارعا سايكەس، پارلامەنتتىك وپپوزيتسياعا پارلامەنتتىك تىڭداۋلار وتكىزۋ، سونداي- اق ماجىلىستەگى ۇكىمەت ساعاتىنىڭ كۇن ءتارتىبىن جاساقتاۋ قۇقىعى بەرىلەدى. بۇل نورمالاردى پايدالانۋ ءۇشىن بەلگىلى ءبىر پارتيا ءوزىن وپپوزيتسيامىن دەپ جاريالاۋ ءتيىس. «ۇلتتىق كەڭەس ۇيىتقى بولعان بۇل زاڭ جوباسى وزگە دە زاڭ جوبالارى سياقتى تالقىلاۋلار مەن پىكىر الماسۋدىڭ ۇزاق جولىنان ءوتتى. اتاپ ايتقاندا، ول ءماجىلىستىڭ بارلىق كوميتەتتەرىندە تالقىلاندى. تەك باس كوميتەتتىڭ وزىندە وسى زاڭ جوباسى بويىنشا جۇمىس توبىنىڭ 7-وتىرىسى بولدى. بۇگىن دە جالپى وتىرىس بارىسىندا بۇل زاڭ جوباسىنا قاتىستى وتە قىزىۋ پىكىرتالاس بولدى. دەگەنمەن، باسقا زاڭ جوبالارىنا قاراعاندا وعان دەپۋتاتتاردىڭ وزدەرى، ونىڭ ىشىندە «اق جول» پارتياسىنىڭ فراكتسياسى باستاماشىلىق جاساعان ەدى. بۇل دا تاڭ قالارلىق جايت ەمەس. سەبەبى ءبىزدىڭ زاڭنامامىزداعى مۇلدەم جاڭا نورما جايىندا ءسوز بولىپ وتىر. جانە دە تەك زاڭنامادا عان ەمەس، تولىقتاي العاندا ساياسي تاجىريبەدە جانە مادەنيەتتە»، - دەدى ق ر پرەزيدەنتىنىڭ كەڭەسشىسى. ەسكە الساق، ءماجىلىس پارلامەنتتىك وپپوزيتسياعا كەپىلدىك بەرەتىن قادامداردى ماقۇلداعانى تۋرالى حابارلاعان بولاتىنبىز.