بۇل تۋرالى ءماجىلىستىڭ جالپى وتىرىسىندا ق ر ادىلەت ۆيتسە-ءمينيسترى ناتاليا پان ءمالىم ەتتى، دەپ حابارلايدى قازاقپارات ءتىلشىسى.
«وكىلەتتى ورگان رەتىندە ادىلەت مينيسترلىگى ساياسي پارتيالاردىڭ مەملەكەت تىركەۋىنىڭ ستاتيستيكاسىن جۇرگىزەدى. وسى ورايدا 2017-2018 -جىلدارمەن سالىستىرعاندا، 2019 -جىلدا ساياسي بەلسەندىلىكتىڭ جوعارىلاعانى بايقالدى. بۇگىندە تىركەلمەگەن 7 ۇيىم بار»، - دەدى ناتاليا پان.
وسى ورايدا ول اتالعان ساياسي پارتيالار نە سەبەپتى تىركەلمەگەنىن اتاپ ءوتتى.
«تىركەۋدەن باس تارتۋدىڭ سەبەبىنە توقتالساق، جەتەۋدىڭ بەسەۋى باستاماشى توپتاردىڭ ءتىزىمىن ۇسىنباۋىنا قاتىستى. بىرەۋىندە ۇيىمداستىرۋ كوميتەتى قىزمەتىنىڭ مەرزىمى ءوتىپ كەتكەن، زاڭدا التى ايلىق مەرزىم قاراستىرىلعان. بۇل تۇرعىدا ادىلەت مينيسترلىگى تىركەۋدەن باس تارتۋعا ءماجبۇر بولادى. تاعى ءبىر بىرلەستىك تەكسەرۋدەن ءوتىپ جاتىر، ياعني ونىڭ مۇشەلەرى شەتەل ازاماتتارى، قۇقىق قورعاۋ ورگاندارىنىڭ قىزمەتكەرلەرى، اسكەري قىزمەتشى، سۋديا بولماۋى كەرەك. وسىنداي شەكتەۋلەر بار. وسى رەتتە جالپى جەتى بىرلەستىك بار»، - دەدى ناتاليا پان.