SARS- CoV-2 ۆيرۋسى تۋدىرعان COVID-19 كوروناۆيرۋس ينفەكتسياسىنىڭ الەمدە كەڭ تاراپ جاتقانىنا بايلانىستى تەمەكى شەگۋدىڭ زيانى مەن ءتىپتى كەيبىر دالەلدەنبەگەن پايداسى تۋرالى دا پىكىرتالاستار ءورشىپ تۇر. عىلىمي دەرەك پەن ساراپشىلاردىڭ پىكىرىنە نازار سالىپ كورەيىك. بريتان مەديتسينالىق جۋرنالىنىڭ (BMJ) ساراپشىلارى قاراپايىم جانە ەلەكتروندى شىلىم شەگەتىندەرگە قانشالىقتى قاۋىپ ءتونىپ تۇرعانى تۋرالى پىكىرمەن ءبولىستى. COVID-19 ناۋقاستىڭ تىنىس الۋ جولدارىن قيىنداتاتىن اۋرۋ.
عىلىمي دەرەكتەردىڭ كوپشىلىگى ۆيرۋستىڭ اعزاعا ەنىپ، ءبولىنۋى ءدال وسى تىنىس الۋ جولدارىندا بولاتىنىن ايتادى. ىندەتتى جۇقتىرىپ الۋ، ونىڭ كۇردەلى بولۋى جانە ولىمگە اكەپ سوعۋىنا شىلىم شەگۋدىڭ قانداي اسەرى بار ەكەنى ءالى تولىق زەرتتەلمەگەن، سەبەبى مۇنداي زەرتتەۋ جۇرگىزۋ ۇزاق ۋاقىتتى الادى. دەگەنمەن، 2009 -جىلى وسىعان ۇقساس رەسپيراتورلىق- ءسينتسيتيالدى (جاسۋشالى) ۆيرۋستى زەرتتەۋ كەزىندە تەمەكى ءتۇتىنى ينفەكتسيانىڭ بەرىلۋ جىلدامدىعىن ارتتىراتىنىن جانە تىنىس جولدارى ۆيرۋستىق ينفەكتسياسىنىڭ قيىندىق تۋدىراتىنىن دالەلدەدى. كەيبىر عىلىمي زەرتتەۋلەر COVID-19 جۇقتىرعاندار اراسىندا شىلىم شەگۋ ءولىم قاۋپىن جوعارىلاتىپ، قارقىندى تەراپيا نەمەسە وكپەنى جاساندى جەلدەتۋدى قاجەت ەتەتىنىن ايتادى. ىندەتپەن العاش بوپ كۇرەسكەن قىتايلىق مەديتسينا قىزمەتكەرلەرى زەرتتەۋلەرىندە COVID-19 ىندەتىنە شالدىققان تەمەكى شەگەتىن ادامداردىڭ %12,4 ى قايتىس بولعانىن نەمەسە قارقىندى تەراپيا نەمەسە وكپەگە جاساندى جەلدەتۋدى قاجەت ەتكەنىن، ال مۇلدەم شىلىم شەكپەگەن ادامداردىڭ %4,7 ى عانا ومىردەن وتكەنىن كورسەتتى.
ودان بولەك، ادام قولىمەن ۇستاپ تۇرعان تەمەكىنى ەرنىنە ءجيى تيگىزۋى ۆيرۋس جۇقتىرۋ قاۋپىن جوعارىلاتادى. CBC News امەريكالىق ساراپشىلاردىڭ پىكىرىن ۇسىنىپ، شىلىم شەگۋ بارلىق جاعدايدا وكپەنىڭ قىزمەتىن ناشارلاتاتىنىن ايتتى. ال وكپە جۇمىسىنا قاۋىپ توندىرەتىن ارەكەتتىڭ بارلىعى كوروناۆيرۋس نەمەسە باسقا دا ۆيرۋستاردى جۇقتىرىپ الۋ قاۋپىن ارتتىرادى. شىلىم شەگۋ اعزانىڭ ينفەكتسيامەن كۇرەسۋگە قابىلەتىن تومەندەتەتىنى فاكت.