ورداباسى اۋدانىندا قاتتى داۋىل ۇيلەردىڭ شاتىرىن ۇشىرىپ، اعاشتاردى قۇلاتتى

اققويلى اۋىلىندا تابيعي اپاتتان 17 ۇيگە شىعىن كەلگەن، دەپ حابارلايدى قازاقپارات ءتىلشىسى.

اۋىل تۇرعىندارى بولسا 2- مامىر كۇنى تۇستە اسپاندا بۇلت ءۇيىرىلىپ، الىپ قۇيىن پايدا بولعانىن ايتادى. ارتىنشا داۋىل تۇرىپ، بار بولعانى 5-10 مينۋت ارالىعىندا جان-جاقتى قيراتىپ كەتكەن.

ءتىپتى جەلدىڭ ەكپىنى قاتتى بولعانى سونشالىق، اعاشتار تامىرىمەن وپىرىلىپ قۇلاعان. ەلەكتر باعانالارى قۇلاپ، سىمدارى ۇزىلگەن.

جەرگىلىكتى حالىق تابيعاتتىڭ توسىن مىنەزىنەن قاتتى قورقىپ، باس ساۋعالاپ كەتكەن. 60 وتباسى تۇراتىن اياداي عانا اۋىلدا 17 ءۇيدىڭ شاتىرى قيراپ، تۇرعىندار شىعىنعا باتقان.

ولار بۇل كورنىستى ۇيالى تەلەفوندارىنا ءتۇسىرىپ، الەۋمەتتىك جەلىلەرگە تاراتقان.

ال، وبلىستىق ت ج د ماماندارى جەلدىڭ ەكپىنى سەكۋندىنا 20 مەترگە دەيىن جەتكەن دەپ وتىر.

«ت ج د باسقارۋ پۋلتىنە شامامەن 15:00 دە اققويلى ەلدىمەكەنىندە قاتتى جەل سالدارىنان 17 ءۇيىڭ شاتىرىن ۇشىرىپ اكەتكەنى تۋرالى حابارلاما كەلىپ ءتۇستى. 420 تۇرعىنى بار اۋىلدا 3 ەلەكتر باعاناسى قۇلاپ، جەرگىلىكتى حالىق جارىقسىز قالعان. وقيعا سالدارىنان ەشكىم زارداپ شەكپەگەن. قازىرگى تاڭدا «وڭتۇستىك جارىق» ج ش س قالپىنا كەلتىرۋ مەن جارىق بەرۋ جۇمىستارىن جۇرگىزۋدە» دەلىنگەن حابارلامادا.

سونداي-اق، قازىرگى تاڭدا اتالعان اۋداندا وسى وقيعاعا بايلانىستى ارنايى شتاب قۇرىلعان. وندا كوميسسيا مۇشەلەرى تابيعي اپاتتان كەلتىرىلگەن شىعىن كولەمىن ەسەپتەۋدە.