بۇعان دەيىن مەملەكەت باسشىسى ەلدىڭ اق، سارى جانە قىزىل اۋداندارىنا بولىنەتىنىن ايتقان بولاتىن. ءار وڭىرگە بايلانىستى شەكتەۋ شارالارى دا ءار ءتۇرلى بولدى. ەندى ۆيرۋستىڭ تارالۋى باسەڭدەگەن، ياعني اق تۇسپەن بەلگىلەنگەن اۋداندار بىرتىندەپ كارانتين رەجيمىنەن شىعا باستادى.
قازىر ايماقتا ساۋدا ورىندارى اشىلىپ، قالاارالىق قاتىناس قالىپتى جۇمىسىنا ورالۋدا. ايتا كەتەيىك، يراندا كوروناۆيرۋستىڭ جاڭا تۇرىنەن 6 مىڭ 203 ادام كوز جۇمدى. ال وسى دەرتكە شالدىققان ناۋقاستاردىڭ سانى 97 مىڭنان استى.
حاسان روۋحاني، يران پرەزيدەنتى:
- كەي كاسىپورىندار مەن ورتالىقتاردى اشا باستادىق. اق تۇسپەن بەلگىلەنگەن تاعى 132 قالا كارانتيننەن شىعاتىن بولادى. قاۋىپسىز ايماقتاردا مەتەپتەر مەن مەشىتتەر اشىلادى. وقۋ ەمتيحان تاپسىرۋ ۋاقىتىنا دەيىن جالعاساتىن بولادى. الايدا بارلىق سانيتارلىق تالاپ ساقتالۋ كەرەك.