30- ءساۋىر كۇنى ساعات 19:30 دا پوليتسيا قىزمەتكەرلەرى بوتانيكالىق باق اۋماعىن تەكسەرىپ جۇرگەن كەزدە سپورت الاڭىندا جۇرگەن ازاماتقا كارانتين رەجيمى تۋرالى ەسكەرتكەن.
پوليتسيا قىزمەتكەرلەرى ەكىنشى رەت اينالىپ كەلگەندە ەر ادام جاتتىعۋىن جالعاستىرىپ جاتقان. وعان ۇيىنە قايتۋىن سۇراعان. الايدا ءتارتىپ ساقشىلارىنىڭ تالابىنا قۇلاق اسپاعان.
«پوليتسيا قىزمەتكەرلەرى تارتىپكە باعىنباعان ازاماتتىڭ كىم ەكەنىن انىقتادى. ول ەلوردانىڭ 44 جاستاعى تۇرعىنى، BE STRONG MMA PROMOTION جانە Battle of Nomads پروموۋتەرلىك كومپانيانىڭ پرەزيدەنتى اناتولي كيم بولىپ شىققان. ول كارانتين رەجيمىن بۇزعانى ءۇشىن ق ر اكىمشىلىك قۇقىقبۇزۋشىلىق كودەكسىنىڭ 476-بابى بويىنشا اكىمشىلىك جاۋاپكەرشىلىككە تارتىلدى. مامانداندىرىلعان اۋداندىق اكىمشىلىك سوتتىڭ قاۋلىسى بويىنشا وعان 10 ا ە ك كولەمىندە ايىپپۇل سالىندى»، - دەلىنگەن قالالىق پوليتسيا دەپارتامەنتىنىڭ باسپا ءسوز حابارلاماسىندا.
سوت ەسىل اۋداندىق پوليتسيا باسقارماسى عيماراتىندا ۆيدەو كونفەرەنتسيا نەگىزىندە ونلاين رەجيمدە وتكەن.
ەسكە سالا كەتسەك، كارانتين رەجيمى كەزىندە قالا تۇرعىندارىنا ساياباق جانە باسقا دا قوعامدىق ورىنداردا جۇرۋگە، سپورتپەن شۇعىلدانۋعا بولمايدى. كوروناۆيرۋس ينفەكتسياسى ءتونىپ تۇرعان قاۋىپ سەيىلگەن جوق. پوليتسيا قىزمەتكەرلەرى شەكتەۋ شارالارى ازايىپ بارا جاتقانىنا قاراماستان تارتىپكە باعىنۋ كەرەك ەكەنىن ايتادى.