حالىقارالىق قۇرىلىم باسشىسى تەدروس ادحانوم گەبرەيەسۋس الەمدىك بۇقارالىق اقپارات قۇرالدارىنىڭ وكىلدەرىمەن ونلاين- بريفينگ كەزىندە وسىلاي دەپ مالىمدەدى. ءبىزدىڭ ارنانىڭ باتىس ەۋروپاداعى ءتىلشىسى جانات ەرنست تە باسپا ءسوز ءماسليحاتىنا قاتىستى.
جانات ەرنست، ءتىلشى:
- دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەيەسۋس ونلاين- بريفينگتە كوروناۆيرۋسپەن كۇرەستە ۇيىمعا مۇشە ەلدەر ۇلتتىق جانە حالىقارالىق دەڭگەيدە ىنتىماقتاستىق تانىتۋ كەرەكتىگىن اتاپ ءوتتى. ءبىزدىڭ داعدارىس كەزىندەگى ايماقتىق سەرىكتەستىك تۋرالى سۇراعىمىزعا ۇيىم باسشىلارى قازاقستانعا ورتالىق ازياعا كومەك كورسەتكەنى ءۇشىن العىسىن ءبىلدىردى. جانە ايماقتىق ءوزارا ىقپالداستىقتىڭ ماڭىزدىلىعىن اتاپ ءوتتى.
مايك رايان، د د س ۇ توتەنشە جاعداي جونىندەگى اتقارۋشى ديرەكتورى:
- قازاقستانعا ايماققا كومەك بەرگەنى ءۇشىن تاعى العىسىمدى بىلدىرەمىن. ىندەتپەن بايلانىستى جاعداي كەزىندە كوبىنە كورشى ەلدەر ءبىر- بىرىنە قولداۋ كورسەتىپ جاتىر. ويتكەنى مۇنداي مەملەكەتتەردىڭ ءتىلى مەن مادەنيەتى ءبىر، ۇستانعان باعىتى ورتاق. سوندىقتان تۇركيادان قازاقستانعا دەيىنگى ايماق بىرلەسىپ ارەكەت ەتە الادى. ءوڭىر ەلدەرىنىڭ كارانتيننەن شىعۋ شارالارىن بىرەلەسىپ تالقىلاۋى ماڭىزدى دەپ سانايمىن.
تەدروس ادحانوم گەبرەيەسۋس، د د س ۇ باس ديرەكتورى:
- ۇيىم كوروناۆيرۋس تارالا باستالعاندا- اق بارشا الەمگە جاڭا ىندەت تۋرالى ەسكەرتىپ، وعان قارسى تۇرۋ ءۇشىن تەز ءارى باتىل ارەكەت ەتتى. ءبىز بىردەن دابىل قاعىپ، دۇنيەجۇزىنىڭ ىندەتكە قارسى الدىن الا دايىندالىپ، ۆيرۋستىڭ كەڭىنەن تارالۋىنا توسقاۋىل قويۋعا مۇمكىندىگى بار ەكەنىن تالاي رەت ايتتىق.
دۇنيەجۇزىلىك دەنساۋلىق ساقتاۋ ۇيىمى وكىلدەرى الەمدە ىندەتتىڭ ەكىنشى تولقىنى باستالۋ مۇمكىندىگى جوعارى ەكەنىن ايتادى. سوندىقتان كارانتين الىنىپ تاستالعاندا دەرتتى جاڭا جۇقتىرعاندار جانە ولارمەن بايلانىستا بولعانداردى تەز انىقتاپ، بارلىق سانيتارلىق تالاپتاردى ورىنداۋ قاجەت دەپ وتىر. وسىعان بايلانىستى دۇنيەجۇزىلىك دەنساۋلىق ساقتاۋ ۇيىمى جۋىق ارادا كىرىسى تومەن جانە ورتاشا ەلدەرگە ۆيرۋستى انىقتاۋعا قاجەتتى تەستتەردى جەتكىزۋدى ۇلعايتپاق.
جانات ەرنست، ءتىلشى:
- بۇگىن جەنيەۆادا دۇنيەجۇزىلىك دەنساۋلىق ساقتاۋ ۇيىمىنىڭ كوروناۆيرۋسقا بايلانىستى الەمدىك احۋالعا قاتىستى كەزەكتى وتىرىسى وتەدى. وندا ىندەتتەن تۋىنداعان داعدارىستى ەڭسەرۋ بويىنشا ۇسىنىستار جيىنتىعىن دايىنداۋ ماسەلەسى تالقىلانباق.
www.24.kz