30 - ءساۋىر كۇنگى سوڭعى مالىمەت بويىنشا، قازاقستاندا كوروناۆيرۋس ينفەكسياسى تاعى 83 ادامنان انىقتالدى. ونىڭ ىشىندە الماتى وبلىسىنان 3 ادام تىركەلدى. ولار كەگەن اۋدانىنىڭ 63، 49 جانە 33 جاستاعى تۇرعىندارى.
«ءۇش ناۋقاستىڭ 2-ەۋى بۇعان دەيىن اۋىرعان سىرقاتپەن بايلانىستا بولعاندىقتان كەگەن اۋداندىق ورتالىق اۋرۋحاناسىنىڭ پروۆيزورلىق بولىمىندە كارانتيندە بولاتىن. قازىر بارلىعى قاراساي اۋداندىق ورتالىق اۋرۋحانانىڭ ينفەكسيالىق بولىمىنە جاتقىزىلادى. ولارمەن بايلانىستا بولعاندار - 12 ادام. بارلىعى وقشاۋلاندىرىلىپ، ەپيدەميولوگيالىق تەكسەرۋلەر جۇرگىزىلۋدە»، - دەلىنگەن اقپاراتتا.
وسىلايشا، بۇگىنگى كۇنى كەگەن اۋدانىندا كوروناۆيرۋس جۇقتىرعاندار سانى 6 ادامعا جەتتى. وسىعان وراي، كەگەن اۋىلىن كارانتينگە جابۋ تۋرالى اۋداننىڭ باس مەملەكەتتىك سانيتارلىق دارىگەرىنىڭ ارنايى قاۋلىسى شىقتى.
ايتا كەتەيىك، بۇعان دەيىن الماتى وبلىسىندا زارەچنىي اۋىلى جانە جاركەنت قالاسى كارانتينگە جابىلعانىن حابارلاعان بولاتىنبىز.
اۆتور: سامال قابىشيەۆا