نۇر-سۇلتان. قازاقپارات - شارىن ۇلتتىق پاركىندە تابيعاتتا سيرەك كەزدەسەتىن البينوس قاراقۇيرىق ۆيدەوعا ءتۇسىرىلدى، دەپ حابارلايدى قازاقپارات ءتىلشىسى.
«ءبىزدىڭ شارىن ۇلتتىق پاركىندەگى ينسپەكتورلارى تەلەفوننىڭ كامەراسىنا البينوس قاراقۇيرىقتى ءتۇسىرىپ الدى. ءتۇسى اپپاق ءتۇز تاعىسى - ءبىز ءۇشىن ۇلكەن سىي. سەبەبى قاراقۇيرىقتىڭ اق ءتۇستى ءتۇرى تابيعاتتا ءجيى كەزدەسە بەرمەيدى. البينوستارعا تىرشىلىك ەتۋ قيىن بولسا دا بۇل قاراقۇيرىق امان قالار دەپ ۇمىتتەنەمىز»، - دەپ جازدى ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت Facebook پاراقشاسىندا.
قاراقۇيرىق قازاقستاننىڭ قىزىل كىتابىنا ەنگىزىلگەن. ءۇشىنشى ساناتتاعى ءتۇز تاعىسى. ياعني اڭنىڭ سيرەك كەزدەسەتىن تۇرىنە جاتادى. بوكەن تۇقىمداس تارماعى مەن قاراقۇيرىق تۇقىمىنىڭ ەلىمىزدەگى جالعىز ءتۇرى.
«جانۋارلار الەمىندە تەرى مەن ءجۇنى، كوزى تابيعي سيپاتتان تىس تۇسكە يە اڭداردى البينوستار دەپ اتايدى. الايدا تابيعي ورتادا ولارعا تىرشىلىك ەتۋ وتە قيىنعا تۇسەتىنىن كوپ ادام بىلە بەرمەيدى. سيرەك كەزدەسەتىن تۇسكە يە اڭدار كوپ جاعدايدا ۇيىرىنەن شەتتەلىپ قالادى دا، ولارعا كوبەيۋ ءۇشىن جۇپ، تىرشىلىك ءۇشىن ازىق تابۋ قيىنعا اينالادى. مۇنداي عاجايىپ - تۋمىسىنان مەلانيننىڭ، ياعني تەرى، ءجۇنى مەن كوزىنىڭ تۇسىنە جاۋاپتى پيگمەنتتىڭ جوقتىعىنان تۇقىم دەڭگەيىندەگى مۋتاتسياعا بايلانىستى بولادى»، - دەپ جازادى ساكەن دىلداحمەت.
البينيزم تۇقىمى ءالسىز بىلىنەتىن سيپاتقا يە. ياعني مۇنداي تۇقىمعا جۇپتىڭ ەكەۋى دە جاتسا عانا ءتول «اپپاق» تۇستە دۇنيەگە كەلەدى. ال ەگەر مۋتاتسيالانعان تۇقىم جۇپتىڭ بىرەۋىندە عانا بولسا ءتول كادىمگى تۇسپەن تۋادى. البينوس - وتە سيرەك كەزدەسەتىن تابيعي قۇبىلىس. سەبەبى ءدال وسىنداي تۇقىمدى اڭداردىڭ كەزدەسۋ ىقتيمالدىعى 1/20 مىڭعا تەڭ.