نۇر-سۇلتان. قازاقپارات - نۇر-سۇلتان قالالىق پوليتسيا دەپارتامەنتى سوققىعا جىعىلعان جۇرگىزۋشى ايەلگە قاتىستى الەۋمەتتىك جەلىدە تاراعان ۆيدەو بويىنشا تەرگەۋ امالدارىن جۇرگىزىپ جاتىر، دەپ حابارلايدى قازاقپارات ءتىلشىسى.
«نۇر-سۇلتان قالالىق پوليتسيا دەپارتامەنتى ا. ن. اليەۆانىڭ سوققىعا جىعىلعانى تۋرالى ۆيدەونى زەرتتەۋدە. ناقتىراق ايتقاندا، 14-ءساۋىر كۇنى ساعات 17.00 شاماسىندا ەلورداداعى قوشقاربايەۆ كوشەسى، 45/1 ءۇيىنىڭ اۋلاسىندا تۇرعىندار اراسىندا كيكىلجىڭ تۋىنداپ، سوڭى قاقتىعىسقا ۇلاسقان. وعان اۆتوكولىك جۇرگىزۋشىلەرىنىڭ جولعا تالاسىپ قالۋى سەبەپ بولعان. جۇرگىزۋشىلەر ءبىر-بىرىنە جول بەرگىسى كەلمەگەن. اقىرى كورشىلەر اراشا ءتۇسىپ، پوليتسيا كەلگەنشە ەكى جاقتى اجىراتىپ العان»، - دەپ حابارلايدى قالالىق پوليتسيا دەپارتامەنتىنەن.
پوليتسيا مالىمەتىنشە، قاقتىعىستان زارداپ شەككەن ايەل اۋرۋحاناعا جاتقىزىلىپ، 20-ءساۋىر كۇنى ۇيىنە شىعارىلعان. قازىر اتالعان وقيعا بويىنشا تەرگەۋ امالدارى جۇرگىزىلىپ جاتىر. ىسكە قاتىستى ادامداردىڭ ءبارى دە تەرگەلۋدە. تەرگەۋ بارىسىن نۇر-سۇلتان قالالىق پوليتسيا دەپارتامەنتىنىڭ باستىعى باقىلاۋىنا العان.
ايتا كەتسەك، بۇعان دەيىن الەۋمەتتىك جەلىلەردە «ەلوردادا جۇرگىزۋشى مۇگەدەك بالانى تاربيەلەپ وتىرعان انانى جول بەرمەگەنى ءۇشىن سوققىعا جىقتى» دەگەن تاقىرىپپەن ۆيدەو تاراپ كەتكەن ەدى.