تۇرعىندار ونى قوقىس جاشىگىنە دەيىن جەتكىزبەيدى. مۇنداي نەمقۇرايلىق - قاۋىپتى. نەلىكتەن قاۋىپتى ەكەنىن ميركوبيولوگيا جانە ۆيرۋسولوگيا ينستيتۋتى ۆيرۋسقا قارسى قورعانۋ لابوراتورياسىنىڭ مەڭگەرۋشىسى اندرەي بوگوياۆلەنسكي جانە ءال-فارابي اتىنداعى قازاق ۇ ۋ ەكولوگيا پروبلەمالارىن عىلىمي- زەرتتەۋ ينستيتۋتىنىڭ ديرەكتورى ايجان ىسقاقوۆا ايتىپ بەردى، - دەپ حابارلايدى Tengrinews.kz ءتىلشىسى.
كوشەدە جاتقان ماسكالار ءتۇرلى اۋرۋدى، سونىڭ ىشىندە كوروناۆيرۋستى دا تاراتا الادى.
«كوروناۆيرۋس ينفەكسياسى نەگىزىنەن اۋا-تامشى ارقىلى جۇعادى. ناۋقاس ماسكا تاعىپ ءجۇرىپ، جوتەلەدى، تۇشكىرەدى، سودان سوڭ ونى كوشەگە لاقتىرادى. وعان جينالعان ۆيرۋس بەلگىلى ءبىر ۋاقىت بويى قاۋىپتى بولادى. سودان سوڭ بارلىعى قۇرعايدى جانە اۋاعا تارايدى. مىنە، سودان كەيىن اۋاعا تاراعان شاڭ-توزاڭ باسقا ادامعا ۆيرۋس جۇقتىرادى. ىقتيمالدىعى تومەن، ءبىراق قاۋىپ بار»، - دەپ ءتۇسىندىردى اندرەي بوگوياۆلەنسكي.
سونداي- اق، مامان مەديتسينالىق ماسكالاردا ۆيرۋستىڭ قانشا ۋاقىت بويى «ءتىرى» بولاتىنىن ايتتى.
«بۇگىندە بۇل سۇراقتىڭ ناقتى جاۋابى جوق. ءبىراق ءبىز ماسكادا ۆيرۋس 30 ساعاتتان استام ۋاقىت بويى ساقتالاتىنىن بولجايمىز»، - دەدى ول.
ۆيرۋسولوگ قولدانعان ماسكانى پوليەتيلەن پاكەتكە سالىپ، قوقىس جاشىگىنە تاستاۋعا كەڭەس بەردى.
«تازالىققا جاۋاپ بەرەتىن كوممۋنالدىق قىزمەت ماماندارى ارنايى كيىم كيەدى. ولاردىڭ ماسكاسى، حالاتى جانە قولعابى بار. سوندىقتان ولار جەردە جاتقان ماسكانى الىپ، قوقىس جاشىگىنە تاستاي الادى. ال ادامداردان جاۋاپكەرشىلىك تانىتىپ، قولدانىلعان ماسكانى ءار جەرگە تاستاماۋدى سۇراعىم كەلەدى»، - دەدى ۆيرۋسقا قارسى قورعانۋ لابوراتورياسىنىڭ مەڭگەرۋشىسى.
سونىمەن قاتار ءال-فارابي اتىنداعى قازاق ۇ ۋ ەكولوگيا پروبلەمالارىن عىلىمي-زەرتتەۋ ينستيتۋتىنىڭ ديرەكتورى ايجان ىسقاقوۆا ماسكالاردىڭ قانشا ۋاقىت بويى توزبايتىنىن ايتتى.
«ەگەر سپانبوندتان (ارنايى ماتەريالدان) دايىندالعان مەديتسينالىق ماسكالار تۋرالى ايتساق، ولار دالادا ۋلتراكۇلگىننىڭ اسەرىنەن ءبىر جىلعا دەيىن، ال كۇننەن جابىق جەردە 3 جىلدان 5 جىلعا دەيىن ساقتالادى. نەگىزىندە، ولاردى مەديتسينالىق قالدىق سياقتى كادەگە جاراتۋ كەرەك. ال، كوشەدە، پاركتەردە جاتقان ماسكالار جالپى قوقىسپەن بىرگە پوليگونعا اپارىلىپ، بارلىق قالدىقپەن بىرگە كادەگە جاراتىلۋى مۇمكىن. ونىڭ ۇستىنە، تاستالعان ماسكالار كەز كەلگەن جەردە جاتىپ، پوتەنتسيالدى قاۋىپتى بولىپ كەلەدى»، - دەدى ايجان ىسقاقوۆا.