«توتەنشە جاعداي كەزىندە ينتەرنەتپەن تۇراقتى تۇردە قامتاماسىز ەتۋ - مەملەكەت باسشىسى قاسىم-جومارت كەمەل ۇلى توقايەۆتىڭ ەرەكشە باقىلاۋىندا. قازىرگى جاعدايدا ينتەرنەت حالىقتىڭ نەگىزگى بايلانىس ارناسىنا اينالدى. ول سونداي- اق ەلەكتروندى ساۋدا، ونلاين-وقۋ، ەلەكتروندىق مەملەكەتتىك قىزمەتتەر، دەنساۋلىق ساقتاۋ، قارجى جانە ەكونوميكا، باسقا دا سالالاردا ماڭىزدى قۇرال بولىپ وتىر. بەلسەندى پايدالانۋشىلار قاتارى ارتىپ كەلەدى. سوندىقتان «سيفرلىق قازاقستان» باعدارلاماسى اياسىندا ينتەرنەت جەلىسىن پايدالانۋشىلاردىڭ ۇلەسى 88 پايىزعا دەيىن، ال تسيفرلىق ساۋاتتىلىقتىڭ دەڭگەيى 83 پايىزعا جەتەدى»، - دەدى اسقار مامين ۇكىمەت وتىرىسىندا.
پرەمەر- مينيستر بۇل مىندەتتەردى وسى جىلدىڭ سوڭىنا دەيىن جۇزەگە اسىرۋ - 5163 ەلدىمەكەندى كەڭ جولاقتى ينتەرنەتپەن قامتاماسىز ەتۋگە مۇمكىندىك بەرەتىنىن جەتكىزدى.
«ناتيجەسىندە اۋىلداردا 7,6 ميلليوننان استام ادام ونلاين ءبىلىم الۋعا، ەلەكتروندى ساۋداعا قول جەتكىزەدى. وسىعان وراي تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە بايلانىس ورتالىقتارىمەن بىرلەسىپ، جوسپارلانعان ەلدىمەكەندەردى ينتەرنەتپەن قامتاماسىز ەتۋ جوبالارىن ۋاقتىلى ىسكە اسىرۋ ءۇشىن بارلىق شارانى قابىلداۋدى تاپسىرامىن. اكىمدىكتەرگە انتەننالىق- ماچتالىق قۇرىلىستاردى سالۋعا جانە بايلانىس جەلىسىن تارتۋعا جەر ءبولۋدى، ەلەكتر جەلىسىمەن قامتاماسىز ەتۋ ماسەلەسىن جەدەل شەشۋدى جۇكتەيمىن»، - دەدى ول.
اۆتور: ايان بەكەن ۇلى