بۇگىنگى تاڭدا وبلىستا كوروناۆيرۋستىڭ 106 جاعدايى تىركەلگەن، 43 ءى ەمدەلىپ شىقتى. نەگىزگى مىندەت - ناۋقاستاردىڭ سانىن كوبەيتىپ الماس ءۇشىن قاتاڭ باقىلاۋدى ۇستاپ تۇرۋ.
- جۇمىسىن باستايتىن شاعىن جانە ورتا كاسىپورىنداردىڭ ءتىزىمىن جاساۋ كەرەك. ولارعا جۇمىسىن قايتا باستاۋ ءۇشىن رۇقسات تەك قاۋىپسىزدىك تەحنيكاسى مەن سانيتارلىق تالاپتاردى ساقتاي الاتىندىعىن دالەلدەي العاندا عانا بەرىلەدى. ولاردىڭ ساقتالۋىن باقىلاۋ اۋدان اكىمدەرىنە جۇكتەلەدى، - دەدى ايماق باسشىسى.
كۇنىنە كەمىندە ەكى رەت دەزينفەكتسيالاۋ جانە قورعانىس كوستيۋمدەرى مەن بەتپەردەلەرىنىڭ بولۋى باستى نازارعا الىنباق. ۇسىنىلعان شاعىن جانە ورتا كاسىپورىندار تىزىمنەن شاشتارازدار مەن سۇلۋلىق سالوندارىن الىپ تاستاۋ تۋرالى شەشىم قابىلداندى. وندا ادامداردىڭ ءجيى بايلانىستا بولۋى مۇمكىن جانە سانيتارلىق تالاپتاردىڭ ورىندالۋى قيىن.
الايدا، قىزمەت كورسەتۋ ستانتسيالارى، اۆتوجۋۋ، ازىق-تۇلىك ەمەس دۇكەندەر جانە باسقا دا وبەكتىلەر ءوز جۇمىسىن باستايدى. ال، مەيرامحانالار مەن ءدامحانالار ءالى دە جەتكىزىپ بەرۋ رەجيمىندە قىزمەت ەتە بەرەدى.
ءتيىستى ورىندار الەۋمەتتىك جەلىلەردە جالعان اقپاراتتار تاراتىپ، قوعامدى دۇرلىكتىرەتىن تۇلعالاردى انىقتاۋ جونىندەگى جۇمىستى جانداندىرۋى ماڭىزدى.
- مەملەكەت باسشىسى ايتقانداي، 11- مامىرعا دەيىن ەل ەكونوميكاسىن قالپىنا كەلتىرۋدىڭ كەشەندى جوسپارى تۇزىلەدى. وسى ورايدا جامبىل وبلىسى دا 7 مامىرعا دەيىن ءوز نۇسقاسىن ازىرلەپ، ۇكىمەتكە ۇسىنۋى كەرەك.
شەكتەۋ شارالارىن ەنگىزۋ ايماق ەكونوميكاسىنا قاي دەڭگەيدە اسەر ەتەتىنى، قانداي شارالار كوپ زارداپ شەگەدى، قاي جەرلەردە تابىستىڭ تومەندەۋى، جۇمىسسىزدىق دەڭگەيى ارتاتىنى تۋرالى بولجام جاساۋ قاجەت. باستاپقى بولجامدارعا سايكەس، بۇل ساۋدا، كاسىپكەرلىك، مادەنيەت، ونەر جانە سپورت سالالارى. وسىعان قاراي، 30 ساۋىرگە دەيىن اۋماقتىق جۇمىسپەن قامتۋ جول كارتاسىن ازىرلەۋ قاجەت.
نەگىزگى ماقسات - كەمىندە 26 مىڭ، ونىڭ ىشىندە 11 مىڭ تۇراقتى جۇمىس ورنىن قۇرۋ، جۇمىس ورىندارىنىڭ جاپپاي بوساۋىنا جول بەرمەۋ. ەڭ باستىسى - ءتارتىپتى ساقتاۋ، ءار ادامنىڭ ءوز تاعدىرى ءۇشىن عانا ەمەس، سونىمەن بىرگە جاقىن جانە اينالاسىنداعى ادامداردىڭ تاعدىرى ءۇشىن دە جاۋاپكەرشىلىكتى سەزىنۋى ءتيىس، - دەدى بەردىبەك ساپاربايەۆ جەدەل شتاب وتىرىسىن قورىتىندىلاي كەلە.