بۇل تۋرالى قازاقپارات سەناتتىڭ باسپا ءسوز قىزمەتىنە سىلتەمە جاساپ حابارلايدى.
وعان ۆيتسە-سپيكەرلەر بەكتاس بەكنازاروۆ، اسقار شاكىروۆ، ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ ءتوراعاسى سەرىك جاقسىبەكوۆ، قارجى جانە بيۋجەت كوميتەتىنىڭ ءتوراعاسى ولگا پەرەپەچينا، اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ ءتوراعاسى ءالي بەكتايەۆ قاتىستى.
داريعا نازاربايەۆا كىرىسپە سوزىندە ەكونوميكانى جاڭعىرتۋ جونىندەگى مەملەكەتتىك كوميسسيا مەملەكەتتەن قولداۋ كورسەتىلەتىن جۇيە قۇراۋشى كاسىپورىنداردىڭ الدىن الا ءتىزىلىمىن انىقتاعانىن اتاپ ءوتتى.
«كاسىپورىنداردىڭ قازىرگى تىزىمىندە قۇرىلىس پەن ساۋدا كومپانيالارىنىڭ ۇلەسى كوبىرەك، ال تاۋ- كەن جانە وڭدەۋ ونەركاسىبى كەنجە قالعان. ەكونوميكالىق ستراتەگيانىڭ باستى ماقساتى - يمپورتتى الماستىرۋ ساياساتىن كۇشەيتۋ بولسا دا وسى. ازىق-تۇلىك قاۋىپسىزدىگى ماسەلەسى - اسا ماڭىزدى ءارى ءبىز ءوزىمىز وندىرەتىن ازىق-تۇلىكتىڭ يمپورتىنان نەمەسە ونسىز دا ءومىر سۇرە الاتىن ونىمدەردەن باس تارتۋ كەرەك»، - دەپ اتاپ ءوتتى داريعا نازاربايەۆا.
سەناتورلار تالقىلاۋ بارىسىندا كاسىپورىنداردى جۇيە قۇراۋشى ولشەم شارتتارىنا جاتقىزاتىن ولشەم شارتتار جۇيەسىن جاڭارتۋ، تۇجىرىمدامالار مەن تاسىلدەردى قايتا قاراۋ قاجەتتىگىن، ويتكەنى قازىرگى ولشەمدەر قاراپايىم زاتتار ەكونوميكاسى ستراتەگياسى مەن ەكونوميكالىق احۋالعا ساي كەلمەي وتىرعانىن اتاپ ءوتتى. جيىندا ءسوز العان ءتوراعا ورىنباسارى بەكتاس بەكنازاروۆ مەملەكەتتىك كومەك اگروونەركاسىپ كەشەنىن قالپىنا كەلتىرۋگە باعىتتالۋى قاجەت ەكەنىن اتاپ ءوتتى.
ول سونداي-اق 2011-جىلى ولشەم شارتتاردى قۇرۋ تۋرالى بۇيرىق جارىق كورگەنىن جانە جەكە كاسىپكەرلىك تۋرالى زاڭ ونىڭ نەگىزى بولعانىن، ول زاڭنىڭ 2015-جىلى كۇشى جويىلعانىن جەتكىزدى.
«بىزگە وسى تۇجىرىمدامالار مەن تاسىلدەردى تۇبەگەيلى قايتا قاراۋ كەرەك. الدىمەن حالقىمىز توق بولۋى ءۇشىن ازىق- تۇلىك قاۋىپسىزدىگىن قامتاماسىز ەتۋ قاجەت. «جۇيە قۇرۋشى» دەگەن ۇعىمنان باس تارتۋ كەرەك. تۇجىرىمداما باسقاشا بولۋى ءتيىس»، - دەدى ب. بەكنازاروۆ.
بۇل رەتتە جەرگىلىكتى اتقارۋشى ورگاندارعا وسى ماسەلە بويىنشا ءوز ويلارىن ورتاعا سالۋعا مۇمكىندىك بەرىلۋى كەرەك. سەناتورلار مەملەكەتتىك قولداۋ اتاۋلى ءارى ءدال بولۋى، ال كاسىپورىنداردى تاڭداۋ ولشەمدەرى مەن ولاردى قولداۋ تەتىكتەرى جالپىعا بىردەي بولماي، ءار سالانىڭ ەرەكشەلىگى ەسكەرىلە وتىرىپ ازىرلەنۋى ءتيىس ەكەنىن اتاپ ءوتتى.
«وڭدەۋ ونەركاسىبىنە باسا نازار اۋدارىلۋى كەرەك. كاسىپورىندار ءتىزىمى جاڭا كريتەرييلەردى ەسكەرە وتىرىپ قايتا قارالۋى ءتيىس»، - دەدى د. نازاربايەۆا.
مەملەكەتتەن كومەك الۋعا ۇمىتكەر كاسىپورىندار وزدەرىنە قانداي مىندەتتەمەلەر الاتىنىن تالداۋ جاساپ، ناقتى انىقتاۋ قاجەت.
«بۇل تىزىممەن ەشقانداي اسىعۋعا بولمايدى. ازىرگە مەملەكەتتىك كومەك تەتىكتەرى مەن قۇرالدارى ناقتى تۇسىنىكتى ەمەس، زاڭنامالىق بازا دا دايىن ەمەس. قولداۋعا تالاپتاناتىن ءاربىر كاسىپورىن رەسمي ولشەمشارتتارعا ساي كەلىپ قانا قويماي، ولار جۇرتشىلىق الدىندا جۇمىس ورىندارىن ساقتاۋعا جانە ۇلعايتۋعا، سالىقتىق تۇسىمدەر، دامۋعا ينۆەستيتسيا سالۋ جوسپارىنا ساي ىشكى سۇرانىس پەن ەكسپورتتى قاناعاتتاندىرۋعا مىندەتتەمەلەر الۋى ءتيىس. ونسىز بولمايدى، قازىر ۋاقىت باسقا»، - دەپ اتاپ ءوتتى داريعا نازاربايەۆا.
كەڭەس قورىتىندىسى بويىنشا قازاقستان رەسپۋبليكاسى پارلامەنتى سەناتى دەپۋتاتتارىنىڭ اتىنان ۇكىمەتكە جۇيە قۇراۋشى كاسىپورىنداردىڭ تاسىلدەمەلەرى مەن ولشەمدەرى ءتىزىلىمىن قالىپتاستىرۋعا قاتىستى ۇسىنىستار ازىرلەنەتىن بولدى.