دياگنوزدى العاش ەستىگەن بويداعى اسىرە، اۋرۋحاناداعى كۇندەر، دارىگەرلەردىڭ ەم- دومى مەن كوروناۆيرۋستان جازىلىپ شىققاننان كەيىنگى كوڭىل- كۇيى تۋرالى ايكوركەم قازاقپارات تىلشىسىنە ايتىپ بەردى.
- ايكوركەم، بۇل ىندەتتى قالاي، قايدان جۇقتىردىڭ؟
- كانادانىڭ ۆانكۋۆەر قالاسىنداعى سايمون فرەيزەر ۋنيۆەرسيتەتىندە وقيتىن ەدىم. الايدا، جاھان جۇرتىنىڭ ۇرەيىن ۇشىرعان كوروناۆيرۋس ينفەكسياسىنا بايلانىستى ۋنيۆەرسيتەتىمىز ونلاين فورماتتاعى وقۋعا كوشتى. سودان ەلگە ورالۋعا جينالدىق. ۋنيۆەرسيتەت بيلەت الىپ بەردى. اتىراۋعا امستەردام ارقىلى ۇشاتىن رەيسپەن كەلگەن بويدا وقشاۋلاندىرىلدىق. ءبىزدىڭ رەيستەگى ءبىر جولاۋشىنىڭ اناليزىنەن كوروناۆيرۋس ينفەكسياسى انىقتالدى. ءسويتىپ، ءبىزدى دە 14 كۇن كارانتينگە، ياعني اتىراۋداعى پروۆيزورلىق ستاتسيونارعا جاتقىزدى. مەندە ينفەكسيا سيمپتومى بولعان جوق. كارانتيندە ءوزىمدى جاقسى سەزىنىپ ءجۇردىم. دەنە قىزۋىم كوتەرىلمەدى. كارانتين مەرزىمى وتكەن سوڭ، ۇيگە بارامىن دەگەن ءۇمىتىم بار ەدى. ءبىراق، دارىگەرلەر مەنەن دە ۆيرۋستىڭ تابىلعانىن حابارلادى.
- سول ساتتە ءوزىڭدى قالاي سەزىندىڭ؟ قورىققان بولارسىڭ؟
- ارينە، اۋرۋدىڭ قاي- قايسىسى دا ادامعا ۋايىم تۋدىرادى عوي. ال، مىناداي قاۋىپتى ىندەتكە شالدىققانىڭ تۋرالى ەستۋ، تىپتەن قورقىنىشتى ەكەنى راس. قاتتى جىلادىم. بىرەۋ سەنەر، بىرەۋ سەنبەس، ءدال سول ساتتە بولاشاعىم بۇلىڭعىر تارتىپ بارا جاتتى. بۇل كۇن مەنىڭ ەسىمدە ماڭگى ساقتالاتىن بولار. ەسىمنەن شىعارا الار ەمەسپىن. بۇل - 8 - ءساۋىر. ءدال وسى كۇنى مەندە قاۋىپتى ىندەتتىڭ بەلگىسى انىقتالدى. سول كۇنى اتىراۋداعى ينفەكسيالىق اۋرۋحاناعا ءتۇستىم. ويىما نە كەلىپ، نە شىقپادى دەيسىز. ءارى- ءسارى كۇيگە ءتۇستىم. ۇيدەگىلەرگە تەلەفونمەن ۇزدىكسىز حابارلاسىپ، «ەندى نە ىستەيمىن؟» دەگەن سۇراقتى قايتا- قايتا قويا بەردىم.
- اۋرۋحاناداعى ءبىرىنشى كۇنىڭ قالاي ءوتتى؟ قانداي ەم- دوم جاسالدى؟
- ينفەكسيالىق اۋرۋحاناداعى العاشقى كۇنىم ۋايىممەن ءوتتى. اۋرۋحاناعا جاتقان ساتتەن باستاپ ەكى ءدارى بەردى. بۇل - كوروناۆيرۋسپەن كۇرەسىپ جاتقان الەم مەديتسيناسى قولدانعان دارىلەر. ءدارى قابىلداعان سوڭ، باستاپقىدا اسقازانىم اۋىردى. كەيىن اۋزىما اشى ءدام كەلەتىن بولدى. دارىگەرلەر بۇل ىندەتتەن ساۋىعاتىنىما سەندىردى.
- جاتقان پالاتاڭ نەشە ادامعا ارنالعان؟
- مەنىمەن بىرگە پالاتادا ءۇش ادام جاتتى. ولاردىڭ ءبىرىن قۇرعاق جوتەل قىسىپ، قاتتى قينالدى. ەندى ءبىرى ءدامدى، ءيىستى مۇلدەم سەزبەدى.
- دارىگەرلەردىڭ ناۋقاستارمەن قارىم- قاتىناسى تۋرالى نە دەيسىڭ؟
- دارىگەرلەرگە ايتار نازىم جوق. ولار كۇن سايىن قاراپ تۇردى. ءبىزدى بالاشا ماپەلەدى. قال- جاعدايىمىزدى سۇرادى. تاڭمەن دارىگەرلەر بەرگەن ءدارىنى قابىلدايمىن. كەيىن دەنە قىزۋىمىزدى ولشەيدى. تاڭەرتەڭگى ساعات 10:00 شاماسىندا دارىگەرلەر جاعدايىمىزدى تەكسەرەدى. ءبىر ريزا بولاتىنىم، دارىگەرلەر ءبىزدى دارىمەن عانا ەمەس، جىلى سوزىمەن دە ەمدەپ شىعاردى. مەنىڭ قاۋىپتى ىندەتتەن جازىلىپ شىعۋىما بار ىنتاسىمەن ەڭبەكتەنگەن جانتورە ورىسبايەۆا، سالتانات قايىروۆا، نۇرفيا قيزاتوۆا، ءاسيا سيدەشوۆالارعا، بارلىق مەديتسينا قىزمەتكەرلەرىنە العىسىم شەكسىز.
- قاۋىپتى ىندەتتى جەڭدىڭ. اۋرۋحانادان شىققان كەزدە قۋانعان شىعارسىڭ؟
- ءيا، قۋانىشىمدا شەك بولعان جوق. سەبەبى، الەمدە بۇل ىندەتتىڭ قۇربانى بولىپ جاتقاندار كوپ عوي. باستاپقىدا «وسى ىندەتتى جەڭىپ شىقسام» دەگەن ارمان بولدى. سول ارمانىم ورىندالعانىنا قۋاندىم. اۋرۋحانادان شىعىپ، ۇيگە كەلە جاتقاندا، كوشەدە كوپ ادامنىڭ الاڭسىز جۇرگەنىن كوردىم. شىنى كەرەك، ءبىرتۇرلى بولدىم. جالپى، ادام ءوز باسىنان وتكىزبەي، قاۋىپ- قاتەردىڭ نە ەكەنىن سەزىنبەيدى عوي. ءبىراق، ەشكىمگە جاماندىق تىلەمەيمىن. تەك ادامدار مۇنداي قاۋىپتى ىندەتتەن ساقتانۋ تالابىن ورىنداسا ەكەن دەيمىن.
- الەۋمەتتىك جەلىلەردە بۇل ىندەتتىڭ بار ەكەنىنە سەنىمسىزدىك بىلدىرگەن جازبالار ءجۇر. بۇعان نە ايتاسىڭ؟
- ءيا، قازىر حالىق اراسىندا «ۆيرۋس جوق، اۋرۋحاناعا جاتىپ شىعۋ ءۇشىن اقشا تولەپ جاتىر» دەگەن الىپ- قاشپا اڭگىمەلەر بار. ودان حاباردارمىن. ءبىراق، سونداي اڭگىمەلەردى تاراتىپ جۇرگەندەر دە، سوعان سەنەتىندەر دە قاتتى قاتەلەسەدى. ويتكەنى، كوروناۆيرۋس - ويىنشىق ەمەس. بۇل - وتە قاۋىپتى ىندەت. كوروناۆيرۋس ءبىزدىڭ ارامىزدا ءجۇر. سوندىقتان، دارىگەرلەر ۇسىنعان ساقتىق شارالارىن قاتاڭ ساقتاعان ءجون. مەنىڭ بارشاعا بەرەر كەڭەسىم - ءوزىڭىزدىڭ، وتباسىڭىزدىڭ، بارشا ادامزاتتىڭ اماندىعىن ويلاساڭىز، تارتىپكە باعىنىپ، تاعى دا قايتالاپ ايتايىن، ساقتىق شارالارىن ساقتاپ، بەي- بەرەكەت ءجۇرۋدى دوعارۋ كەرەك.
- ەندى ۇيدەگى كارانتيندى قالاي وتكىزەسىڭ؟
- دارىگەرلەردىڭ بەرگەن كەڭەسىن ساقتايمىن. ۇيدە 21 كۇندىك كارانتيندە بولامىن. مەكەنجايىم بويىنشا تىركەلگەن ەمحاناداعى ەپيدەميولوگ- دارىگەرگە كۇن سايىن جاعدايىمدى حابارلاپ، ۆيدەو جىبەرىپ وتىرامىن. كارانتين مەرزىمى اياقتالعان سوڭ، قايتادان اناليز تاپسىرامىن. ءبارى دە جاقسى بولسا ەكەن دەپ تىلەيمىن.
- اڭگىمەڭە كوپ راحمەت!
اۆتور: بەك مۇستافا