جۇيەلى جۇمىستىڭ ناتيجەسىندە ولار ادىستەمەلىك نۇسقاۋلىق جاساپ، جاعدايى اۋىر ناۋقاستى ەمدەپ شىعاردى، دەپ حابارلايدى قازاقپارات ءتىلشىسى.
سەمەي مەديتسينا ۋنيۆەرسيتەتىنىڭ رەكتورى ەرسىن ءجۇنىسوۆتىڭ ايتۋىنشا، كوروناۆيرۋس جۇقتىرعان ادامداردى ەمدەۋ بويىنشا نۇسقاۋلىق دۇنيەجۇزىلىك جانە جەكە تاجىريبەگە نەگىزدەلىپ جاسالعان.
«بۇل نۇسقاۋلىقتا قاۋىپتى دەرتپەن اۋىراتىن ناۋقاستاردى ەمدەۋگە كومەكتەسەتىن پرەپاراتتار مەن تەحنولوگيالاردى رەت- رەتىمەن تىزبەكتەپ شىقتىق. ءبىز ەلىمىزدە ءبىرىنشى بولىپ وسىنداي ادىستەمەلىك نۇسقاۋلىق جاساعان ەكەنبىز. ونى قازاق، ورىس جانە اعىلشىن تىلدەرىندە شىعاردىق. بۇل نۇسقاۋلىق قازىر قازاقستانداعى بۇكىل وبلىس، قالالارعا تارالدى» ، - دەيدى ول. ونىڭ ايتۋىنشا، ۋنيۆەرسيتەت زەرتتەۋ جۇمىستارىن ءجيى جۇرگىزەدى. سوڭعى ءۇش ايدىڭ ىشىندە ونداعى عالىمدار ۆيرۋسپەن كۇرەسۋدەگى الەم تاجىريبەسىن ساراپتاپ شىققان.
«عالىمدارىمىز «كوروناۆيرۋس ينفەكتسياسى انىقتالعان ناۋقاستاردى ەمدەۋ ناتيجەسىنىڭ بولجامى مەن قاۋىپ- قاتەر كارتاسىن» جاسادى. دارىگەرلەر وزدەرىنە ىڭعايلى بولۋ ءۇشىن نۇسقاۋلىقتاعى كەز- كەلگەن ءبولىمدى اشىپ ەمدەۋ كەزىندە قانداي جاعدايلارعا تاپ بولۋلارى ىقتيمال، قانداي پروبلەمالار تۋىنداۋى مۇمكىن جانە ولاردى قالاي بولدىرماۋعا بولاتىندىعىن بىلە الۋلارى كەرەك. ءبىز ۋحاننىڭ تاجىريبەسىن زەردەلەپ، ونداعى بارلىق باسىلىمداردى جانە وڭتۇستىك كورەيا مەن جاپونيانىڭ تاجىريبەلەرى جازىلعان جازبالاردى اۋدارىپ شىقتىق» ، - دەيدى ەرسىن ءجۇنىسوۆ.
ايتا كەتەيىك، وسى نۇسقاۋلىقتىڭ ارقاسىندا سەمەي قالاسىندا اۋىر جاعدايدا جاتقان ناۋقاس ەمدەلىپ شىققان. 27 -ءساۋىر كۇنى ول اۋرۋحانادان شىعارىلماق.