«ەڭ الدىمەن، بارلىق مەملەكەتتەر ءوزىنىڭ ەكونوميكالىق ستراتەگياسىن قايتا قاراپ جاتىر. دەربەس تابىسقا، ءوز رەسۋرسىنا ارقا سۇيەۋگە، وندىرىستىك جانە قارجىلىق تىزبەكتىڭ سەنىمدى بولۋىنا باسىمدىق بەرىلەدى. ەكىنشىدەن، جاڭا سالالىق باسىمدىقتار قالىپتاسادى. ءتيىمسىز سەكتورلار جوعالادى. الايدا، وزگە سالالار كوشباسشى اتانىپ، ەكونوميكانى دامىتادى، ادامداردى جۇمىسپەن قامتيدى. ۇشىنشىدەن، بارلىق اۋقىمدى داعدارىستار الەمنىڭ تەحنولوگيالىق جانە ەكونوميكالىق رەتىنىڭ تسيكلدىق اۋىسىمىمەن بايلانىستى جانە ءقازىر ەسكى مودەلدىڭ قيراۋى ءجۇرىپ جاتىر»، - دەدى نۇرسۇلتان نازاربايەۆ قاۋىپسىزدىك كەڭەسىنىڭ وتىرىسىندا.
ەلباسى قازاقستاندا جاھاندىق سىن- قاتەردى ەڭسەرۋگە قاجەتتى بارلىق رەسۋرستار بار ەكەنىن اتاپ ءوتتى.
«وتكەن جىلدارى شيكىزاتتىق رەسۋرسقا تاۋەلدىلىكتى ازايتۋ ءۇشىن اۋقىمدى جۇمىس جۇرگىزدىك. سوندىقتان، بارلىق نەگىزگى دامۋ باعدارلامالارى - يندۋستريالاندىرۋ، شاعىن جانە ورتا بيزنەس، ينفراقۇرىلىمدار، اگروونەركاسىپتىك كەشەن، الەۋمەتتىك باعدارلامالار ازىرلەندى. ولارعا ۇلكەن رەسۋرس ءبولىندى. ۇلتتىق قوردا اۋقىمدى قاراجات كولەمىن جينادىق. بۇل قور كەزەكتى رەت ەلىمىزدى داعدارىستان قۇتقارۋدا. ءبىراق، ونى دا شەكسىز پايدالانۋعا بولمايدى، ۇنەممەن قاجەت كەزدە عانا قولدانعان ءجون» ، - دەدى تۇڭعىش پرەزيدەنت. ايتا كەتەيىك، بۇگىن نۇرسۇلتان نازاربايەۆتىڭ توراعالىعىمەن بەينەكونفەرەنتسيا رەجيمىندە قاۋىپسىزدىك كەڭەسىنىڭ وتىرىسى ءوتتى. وتىرىستا كوروناۆيرۋس ەپيدەمياسىمەن كۇرەستىڭ، ەكونوميكانى قالپىنا كەلتىرۋ مەن مەملەكەتتىڭ داعدارىستان كەيىنگى دامۋىنىڭ ستراتەگيالىق ماسەلەلەرى قارالدى.