وڭتۇستىك كورەيادا تۇرعىندار ەرلىك جاساعان قازاق جىگىتىن ماراپاتتاۋدى ۇسىنىپ، پرەزيدەنتكە حات جازدى
تەلەارنانىڭ حابارلاۋىنشا، تۇركىستاندىق ءالي وتباسىمەن بىرگە 2017-جىلى يان يان شيپاجايلى قالاشىعىنا جۇمىس ىزدەپ كەلگەن. وقيعا وتكەن ايدا بولعان. 23- ناۋرىز كۇنى تۇنگى ساعات 11 دە ءتۇتىن ءيىسىن سەزگەن.
سويتسە، كورشى پاتەرلەردىڭ بىرىندە ءورت شىققان. ءورت بولعان بولمە ىشىندە ايەل قالىپ قالعان. ءالي ول بولمەنىڭ ەسىگىن اشا الماي، پاتەرگە گاز قۇبىرىمەن جانە تەلەكابەلمەن ورمەلەپ شىعىپ، ىشىنە كىرگەن.
وكىنىشكە قاراي، ءورت شىققان پاتەردە بولعان ايەل كەيىننەن اۋرۋحانادا كوز جۇمعان. وتانداسىمىز وزگە كورشىلەرىن وياتىپ ۇلگەرگەن. سونىڭ ارقاسىندا ولار دەر كەزىندە سىرتقا شىعىپ، امان قالعان.
«ىشكە كىرىپ، ەسىكتى اشىپ شىققان سوڭ ءورت سوندىرۋشىلەر كەلدى. جەدەل جاردەم، ءبارى كەلدى. كارىس ايەلدى اۋرۋحاناعا دەيىن اپاردى، كومەكتەستى»، - دەدى ءالي.
جەرلەسىمىز ەرلىگى جايلى دا، ءورت كەزىندە دەنەسىن كۇيىك شالعانى تۋرالى دا تۋىستارىنا ءتىس جارماپتى.
مەديتسينالىق كومەكتەن دە باس تارتقان. الايدا كورشىلەرى بوي بەرمەي، ونى اۋرۋحاناعا جەتكىزىپ، ەمگە كەتەتىن شىعىندى وزدەرى تولەگەن.
«كەشە گازەتتە، ينتەرنەتتە سوسىن فەيسبۋكتە شىققاننان كەيىن ۇيدەگىلەر كورىپ، انام جىلاپ جىبەردى. ول بىلمەيتىن ەدى. كوردى. قولىم، قۇلاعىم، موينىم داكەمەن ورالعان. جۇمىستا ونداي-ونداي بولادى، قۇلاپ ءتۇستىم دەدىم»، - دەدى ءالي.
تەلەارنا مالىمدەگەندەي، ءالي جاقىندا ۇيىنە قايتادى. رەيسى 1- مامىرعا جوسپارلانعان.
الايدا كورشىلەرى ونىڭ كەتكەنىن قالامايدى. سوندىقتان وڭتۇستىك كورەيا پرەزيدەنتىنىڭ اتىنا حات جازىپ، جەرلەسىمىزدى ماراپاتقا ۇسىنۋ تۋرالى ءوتىنىش ءبىلدىرىپتى. كورشىلەرى ەلدىڭ ادىلەت مينيسترلىگىنە دە ونىڭ ەرلىگى جايلى جازىلعان ماقالالار ۇسىنعان. سونىڭ ارقاسىندا ونىڭ كورەيادا ءجۇرىپ-تۇرۋ ۋاقىتى ۇزارتىلدى.