«قۇرمەتتى دوستار، ارىپتەستەر! وزدەرىڭىز بىلەتىندەي، قازىر مەن ەلورداداعى ستاتسيونارلاردىڭ بىرىندە جاتىرمىن. ماعان قاتىستى جاڭالىق وسىنشاما رەزونانس تۋعىزار دەپ ويلاعان جوقپىن. قولداۋ بىلدىرگەن لەبىزدەردى وقىپ جاتىرمىن. قولداۋلارىڭىز ماعان كۇش بەرەدى. سىزدەرگە كوپ راحمەت»، - دەپ جازدى كامالجان نادىروۆ Facebook پاراقشاسىندا.
بۇرىنعى ۆيتسە- مينيستر اۋرۋدى جەڭىل كوتەرىپ جاتقانىن ايتادى. «دارىگەرلەر بارىنشا جىگەرلى ءارى ۇيلەسىمدى، كاسىبي جۇمىس ىستەۋدە. وسى ۋاقىتقا دەيىن شەبەرلىگىن شىڭداعانى كورىنىپ تۇر. ولار ناعىز باتىرلار! ولارعا تاعزىم ەتەم. قىزمەت بابىمەن ايماقتاردى ارالاپ، ارىپتەستەرمەن كەزدەسىپ، اۋرۋحانالاردا بولدىم. اۋرۋدى جۇقتىرىپ الۋ قاۋپىن ەسكەرە وتىرىپ، COVID-19 بويىنشا قايتا- قايتا تەستىلەۋدەن دە ءوتىپ ءجۇردىم. بۇرىن تەست ناتيجەلەرىنىڭ ءبارى دە جۇقتىرماعانىمىزدى كورسەتكەن ەدى. ءبىراق كەشە كەشكە ناتيجە باسقاشا بولىپ شىقتى. بۇل ءبىزدىڭ كوزگە كورىنبەيتىن جاۋىمىزدىڭ قانشالىقتى زۇلىم ەكەنىن تاعى ءبىر مارتە كورسەتىپ وتىر»، - دەيدى ول.
كامالجان نادىروۆ ەمحاناعا جاتپاعاندا الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى قىزمەتىندە جۇمىسىن باستاۋى كەرەك ەدى. «قالاي ساۋىعام، سولاي قاتارعا قايتا قوسىلىپ، وزىمە تاپسىرىلعان اۋماقتا جۇمىسىمدى جالعاستىرا بەرەمىن. ازىرشە قاشىقتان ەڭبەك ەتەمىن. قازاقستاندىقتارعا تاعى دا ايتارىم: ۆيرۋس ءبىز ويلاعاننان دا جاۋىز. ونىڭ كەي ادامنىڭ بويىندا كورىنبەي تىرشىلىك ەتۋى - ءبىزدىڭ دياگنوستيكانى كۇردەلەندىرە تۇسەدى. سول سەبەپتى الدىن الۋدىڭ بارلىق قامىن قاراستىرعان ابزال. وقشاۋلانۋ كەرەك. وزدەرىڭىزدى ساقتاڭىزدار!» - دەپ جازادى كامالجان نادىروۆ.
اۆتور: ايان بەكەن ۇلى