«وزدەرىڭىزگە بەلگىلى، 30-ناۋرىزدان باستاپ، دەنساۋلىق ساقتاۋ مينيسترلىگى تولىقتاي قاشىقتان جۇمىسقا كوشكەن بولاتىن. سوندىقتان، مينيسترلىك ىشىندە دەرت جۇقتىرۋ قاۋپى مينيمالدى، قىزمەتكەرلەردىڭ 90 پايىزى ۇيدەن جۇمىس ىستەپ وتىر. جۇمىستا ءمينيستردىڭ ءوزى (ەلجان ءبىرتانوۆ - رەد. ) جانە 3-4 ادام عانا قالدى. ولاردىڭ دا ءارقايسىسى جەكە كابينەتتە بولعاندىقتان، جۇقتىرۋ قاۋپى از دەگەن ويدامىز. دەگەنمەن، بۇگىن مينيستر ەلجان امانتايەۆ كوروناۆيرۋس ينفەكسياسىنا تەست تاپسىرادى. ناتيجەسى شىققان سوڭ، ارينە حابارلايمىز»، - دەدى دياس احمەتشارىپ قازاقپارات تىلشىسىنە بەرگەن جاۋابىندا.
ونىڭ ايتۋىنشا، ك. نادىروۆپەن جاقىن جانە ىقتيمال بايلانىستا بولعاندار انىقتالىپ جاتىر. ەپيدەميولوگيالىق تەكسەرۋ باستالدى.
«سوڭعى كۇندەرى كامالجان نادىروۆ مينيستر تاپسىرماسىمەن الماتى وبلىسىندا بولدى. الماتى قالاسىندا ەمحانادان اۋرۋ وشاعى شىعىپ، دارىگەرلەردىڭ اراسىندا تۇسىنىسپەۋشىلىك تۋعاندا دا، ك. نادىروۆ بارعان ەدى. ارينە، قورعانىس كيىمىن كيىپ، بارلىق تالاپتاردى ساقتادى. دەگەنمەن، اۋرۋدىڭ كىمنەن، قاي جەردەن جۇققانىن انىقتاۋىمىز قاجەت. ول كىسى قازىر قاي كۇنى قايدا بولعانىن، كىممەن كەزدەسكەنىن تىزبەكتەپ جازىپ وتىر. بايلانىستا بولعان بارلىق ادامدارعا پ ت ر ارقىلى دياگنوستيكا جاسالادى»، - دەدى رەسمي وكىل.
ايتا كەتسەك، دەنساۋلىق ساقتاۋ ۆيتسە-ءمينيسترى بولعان كامالجان نادىروۆ كوروناۆيرۋس ينفەكسياسىن جۇقتىرىپ، اۋرۋحاناعا جاتقىزىلدى. ول الماتى قالاسى دەنساۋلىق ساقتاۋ باسقارماسىنىڭ باسشىسى قىزمەتىنە كىرىسۋى كەرەك ەدى. بۇعان دەيىن مينيسترلىك وكىلى د. احمەتشارىپ ك. نادىروۆتىڭ قانداي حالدە جاتقانىن ايتىپ بەرگەن ەدى.
اۆتور: ايجان سەرىكجان قىزى