ونىڭ ايتۋىنشا، بيىل وسى باعدارلاما جوبالارىن ىسكە اسىرۋدا 200 مىڭ ادام جۇمىسپەن قامتىلادى. ولار 4 مىڭ شاقىرىم جول قۇرىلىسىمەن جانە قايتا جاڭارتۋمەن اينالىسادى. تالدىقورعان- وسكەمەن، قاراعاندى- بالقاش- قاپشاعاي، قالباتاۋ- مايقاپشاعاي، مەركە- بۋرىل- بايتال، ءۇشارال- دوستىق، اقتوبە- استراحان، ۇزىناعاش- وتار، پەتروپاۆل- رەسەي شەكاراسى، قوستاناي- دەنيسوۆكا سىندى 2,6 مىڭ شاقىرىم جول پايدالانۋعا بەرىلەدى.
«بيىل رەسپۋبليكالىق ماڭىزى بار جولداردى پايدالانۋعا بەرۋ كولەمى وتكەن جىلعى كورسەتكىشپەن سالىستىرعاندا 4 ەسە ارتىق. سونىمەن بىرگە، جەرگىلىكتى ماڭىزى بار 3,5 مىڭ شاقىرىم جول جوندەۋدەن جانە قۇرىلىستان كەيىن پايدالانۋعا بەرىلەدى. قازاقستان تاريحىندا بۇرىن- سوڭدى مۇنداي اۋقىمدى جولدار سالۋ بويىنشا جۇمىس جۇرگىزىلگەن جوق. سوندىقتان ءبىزدىڭ مىندەتىمىز - ولاردى تولىعىمەن جانە ۋاقىتىندا ورىنداۋ. سول سەبەپتى، وسى مىندەتتەردى ورىنداۋ ءۇشىن بارلىق كۇشتى جۇمىلدىرۋ قاجەت»، - دەپ اتاپ ءوتتى پرەمەر-مينيستر ۇكىمەتتىڭ ونلاين وتىرىسىندا. وسىعان قاراي اسقار مامين يندۋستريا جانە ينفراقۇرىلىمدىق دامۋ مينيسترلىگىنە تاپسىرمالار جۇكتەدى.
«اكىمدىكتەرمەن جانە قازاۆتوجولمەن بىرلەسىپ، وسى جىلعا جوسپارلانعان جوبالاردى ۋاقىتىندا ىسكە قوسۋدى قامتاماسىز ەتۋ كەرەك. قۇرىلىس ماۋسىمىن بارىنشا ءتيمدى پايدالانۋدىڭ ماڭىزى وتە زور. كارانتين جاعدايىنا بايلانىستى كەيبىر ەلدى مەكەندەردە نىساندارعا جانار- جاعارمايدى، جول- قۇرىلىس ماتەريالدارىن جانە تەحنيكانى كەدەرگىسىز جەتكىزۋ ءۇشىن «جاسىل ءدالىزدى» قامتاماسىز ەتۋ قاجەت»، - دەدى ول.
ەكىنشىدەن، جولداردى ساپالى دەڭگەيدە كۇتىپ- ۇستاۋ ءۇشىن جانە بيۋدجەتكە تۇسەتىن تۇسىمدەردى ارتتىرۋ ءۇشىن جىل سوڭىنا دەيىن 5,7 مىڭ شاقىرىمدى قۇرايتىن جولداردى اقىلى جۇيەگە اۋىستىرۋ بويىنشا جۇمىستاردى اياقتاۋ قاجەت.
«ءۇشىنشى، اۆتوجولداردىڭ اۋقىمدى قۇرىلىسى وتاندىق قۇرىلىس ماتەريالدارىن پايدالانۋدى تالاپ ەتەدى. سوندىقتان، يندۋستريا مينيسترلىگىنە وتاندىق قۇرىلىس ماتەريالدارى ءوندىرىسى قۋاتىن بارىنشا ىسكە قوسۋدى تاپسىرامىن»، - دەدى اسقار مامين.
بۇعان دەيىن پرەمەر- مينيستر كارانتيندىك رەجيمدى بىرتىندەپ جەڭىلدەتۋ جۇمىستارى جونىندە پىكىر بىلدىرگەن ەدى.
اۆتور: ايجان سەرىكجان قىزى