ۆيرۋسپەن كۇرەستە ءبىز بىرگەمىز - قىتاي دارىگەرلەرى

الماتى. قازاقپارات - بۇگىندە ەپيدەميولوگيالىق احۋال كۇردەلى ءوڭىر - الماتىعا قىتايدان مەديتسينا ماماندارى كەلدى.

شەتەلدىك ساراپشىلار كوروناۆيرۋسپەن كۇرەستە تاجىريبە بولىسەدى، دەپ حابارلايدى قازاقپارات ءتىلشىسى.

بۇگىن پۋلمونولوگيا، ەپيدەميولوگيا، قوعامدىق دەنساۋلىق ساقتاۋ سالاسىنىڭ 10 بىلىكتى مامانى سانجار اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ ۇجىمىمەن، الماتى اكىمدىگىنىڭ وكىلدەرىمەن، ق ر د س م وكىلدەرىمەن ۆيدەو كەزدەسۋ وتكىزدى. ونلاين رەجىمدە وتكەن كەزدەسۋ بارىسىندا ۋنيۆەرسيتەت باسشىسى تالعات نۇرعوجين قىتايلىق دارىگەرلەرگە تاجىريبەسىمەن بولىسكەنى ءۇشىن العىس ءبىلدىردى.

«ءبىز قىتايلىق ارىپتەستەرىمىزدىڭ كەلگەنىنە قۋانىشتىمىز. سىزدەردىڭ تاجىريبەلەرىڭىز ءبىزدىڭ ەلدەگى دەرتپەن كۇرەسكە سەپتىگىن تيگىزەدى دەپ سەنەمىز. سىزدەردەن الدە دە دياگنوستيكا مەن ەمدەۋ تۋرالى ماعلۇمات بىلگىمىز كەلەدى»، - دەدى تالعات نۇرعوجين.

جيىن بارىسىندا قالالىق قوعامدىق دەنساۋلىقساقتاۋ باسقارماسىنىڭ باسشىسى تىلەۋحان ابىلدايەۆ قالاداعى ەپيدەميولوگيالىق احۋالدى بايانداپ بەردى.

«قازىر الماتىدا كوروناۆيرۋستىڭ 525 جاعدايى تىركەلگەن. 100 مىڭ ادامعا شاققاندا كورسەتكىش 25,6 پايىز بولىپ تۇر. بايلانىستا بولعانداردىڭ 90 پايىزنان ۆيرۋس تابىلدى. 85 ادام جازىلىپ شىققان. بۇل اۋىرعانداردىڭ شامامەن 16,6 پايىزى بولىپ تۇر. ءبىرىنشى جاعداي تىركەلگەلى بەرى الماتىدا جۇعۋ دەڭگەيى 2-58 پايىز ارالىعىندا بولىپ تۇر. كوپشىلىگى 13,14-ءساۋىر كۇندەرى انىقتالعان. اۋرۋ كورسەتكىشى تولقىندى تۇردە كورىنىس بەرىپ كەلەدى. الماتىدا 6 زەرتحانادا پ س ر تاسىلىمەن دياگنوستيكا جاسالىپ جاتىر. ولار كۇنىنە 1500 زەرتحانالىق تالداۋ جاساي الادى. قالادا ينفەكتسيالىق ستاتسيونارلاردا 800 توسەك ورىن بار. قازىر ولاردىڭ 54 پايىزى عانا تولعان. 5 ادام قايتىس بولسا، 85 ادام جازىلىپ شىقتى. ونىڭ 4 ى بالا»، - دەدى تىلەۋحان ابىلدايەۆ.

قىتايدان كەلگەن مەديتسينا ماماندارى الماتى دارىگەرلەرىنىڭ كوروناۆيرۋسپەن كۇرەس دەڭگەيىن وتە جوعارى باعالادى. ولار دياگنوستيكا مەن ەمدەۋ سالاسىنىڭ قاي وبلىستارىندا جۇمىستى كۇشەيتۋگە كەڭەس بەردى. «الدىمەن بايلانىستا بولعان ادامداردى تاپ باسىپ انىقتاۋ كەرەك. دياگنوستيكالىق مۇمكىندىكتى كۇشەيتۋ كەرەك. الماتىدا جۇقتىرعان ادامداردىڭ تەڭ جارتىسى مەديتسينا ماماندارى ەكەن. ولاردى قورعانىس شارالارىنا ۇيرەتۋ كەرەك»، - دەدى قىتايلىق ماماندار.

«ارىپتەستەرىمنىڭ پىكىرىمەن كەلىسەم. باس سانيتارلىق دارىگەردىڭ تاپسىرماسىمەن قالاداعى بارلىق مەديتسينالىق مەكەمەلەر پروۆيزورلىق رەجىمگە كوشەدى. بارلىق مەديتسينا ماماندارى جەكە قورعانىس قۇرالدارىمەن قامتىلاتىن بولادى. سونىمەن قاتار، ق ر قورعانىس مينيسترلىگىنىڭ گوسپيتالدەرىن قوسقاندا توسەك ورىندى 1000 عا جەتكىزە الامىز. سونىمەن قاتار 280 ورىنعا ارنالعان مودۋلدى گوسپيتال سالىنىپ جاتىر. زەرتحانالاردا تالداۋ مۇمكىندىگىن كۇنىنە 3000 تەستكە جەتكىزە الادى»، - دەدى باسقارما باسشىسى ت. ابىلدايەۆ. قىتايلىق ماماندار ۆيدەوكونفەرەنتسيا سوڭىندا قازاقستاندىقتارعا ۆيرۋستى جەڭىپ شىعۋعا تىلەك ءبىلدىردى.

«ۆيرۋس شەكارانى بىلمەيدى. ۆيرۋسپەن كۇرەستە ءبىزدىڭ دوستىعىمىز ايقىندالا تۇسپەك»، - دەدى شەتەلدىكتەر.