الايدا سوڭعى اقپار بويىنشا، ايماقتا العاشقى دەرەك راستالعان. ءۇندىستاندا دا جاعداي وڭىپ تۇرعان جوق. مۇندا حالىق تىعىز تۇراتىن لاشىقتاردا ناۋقاس سانى ارتىپ بارادى. سوندىقتان دارىگەرلەر ىندەت تەز تاراپ كەتە مە دەپ قاۋىپتەنىپ وتىر.
ال يراندا جاعداي جاقسارعانعا ۇقسايدى. سەبەبى يسلام رەسپۋبليكاسىندا وسىمەن بىرنەشە كۇن قاتارىنان كىسى ءولىمى ازايىپ كەلە جاتىر. يران ەڭ كوپ ناۋقاس تىركەلگەن 10 ەلدىڭ قاتارىنا كىرەدى. مۇندا راستالعان دەرەكتەردىڭ سانى 78 مىڭعا تاياپ قالدى. شەتەلدىك اقپارات قۇرالدارى 54 مىڭنان اسا ناۋقاستىڭ ايىعىپ شىققانىن حابارلايدى. تاعى 4900-عا جۋىعى كوز جۇمعان. نەگىزى بۇل ەلدە وسى اپتادا جۇقتىرۋ دەرەكتەرى ازايىپ كەلە جاتىر. ماسەلەن، دۇيسەنبىدە 111 ادام قايتىس بولسا، سوڭعى كۇندەرى ءبىر تاۋلىكتەگى ءولىم سانى 100 دەن اسپاي تۇر. بيلىك ەپيدەميا شارىقتاۋ شەگىنە جەتكەنىن ايتادى.
11 - ساۋىردەن باستاپ مۇندا كەيبىر دۇكەندەر اشىلىپ، زاۋىتتار جۇمىسىن قايتا جانداندىردى. دەسە دە تاماقتانۋ ورىندارى مەن ويىن- ساۋىق مەكەمەلەرى سول كۇيى جابىق تۇر. ال بيلىك بوساڭسۋعا بولمايتىنىن ايتادى. وسى رەتتە مۇمكىندىگىنشە ۇيدە وتىرىپ، سىرتتا ماسكامەن جۇرۋگە شاقىرىپ وتىر. ماسكا دەمەكشى، ەل استاناسى تەگەراننان 114 شاقىرىم جەردە نەبارى 25 كۇننىڭ ىشىندە بەتپەردە شىعاراتىن زاۋىت تۇرعىزىلعان. قازىر مۇندا كۇنىنە 100 مىڭ دانا ماسكا وندىرىلەدى.
رەسەيدە سوڭعى تاۋلىكتە كوروناۆيرۋستى تاعى 4069 ادام جۇقتىرعان. ءسويتىپ راستالعان دەرەكتەر سانى 32 مىڭعا جەتتى. ولار ەلدىڭ بۇكىل 85 وڭىرىندە تىركەلگەن. كەشەگە دەيىن التاي رەسپۋبليكاسى ىندەت قۇرساۋىنان امان قالعان جالعىز عانا ايماق سانالىپ كەلگەن ەدى. الايدا مۇندا ايەل ادامنىڭ ۆيرۋستى جۇقتىرعانى راستالدى. ناۋقاسقا جاقىندا وزگە وڭىردە تۇراتىن تۋىسقاندارى قوناققا كەلگەن ەكەن. ەڭ كوپ وقيعا بۇرىنعىشا - ماسكەۋدە. وسى رەتتە ماماندار شاھاردا ەپيدەميا 2 اپتادان كەيىن، ياعني مامىردىڭ باسىندا شارىقتاۋ شەگىنە جەتەدى دەگەن بولجام جاساپ وتىر. بۇگىن ماماندار ەپيدەميانىڭ شارىقتاۋ شەگىنە قاتىستى بولجام جاسادى.
ال بۇعان دەيىن پرەزيدەنت جەڭىس كۇنىنە ورايلاستىرىلعان پارادتىڭ كەيىنگە شەگەرىلەتىنىن جاريا ەتتى. الايدا اۋقىمدى شارانىڭ قاي كۇنى وتەتىنى ازىرگە بەلگىسىز. سەبەبى ەپيدەمياعا بايلانىستى جاعداي قالاي ءوربيتىنى بەيمالىم. ماسكەۋ مەرىنىڭ ورىنباسارى اناستاسيا راكوۆا قازىرگى احۋالعا قاتىستى مالىمدەمە جاسادى.
اناستاسيا راكوۆا، ماسكەۋ قالاسى ءمەرىنىڭ الەۋمەتتىك دامۋ سۇراقتارى بويىنشا ورىنباسارى:
- الداعى ۋاقىتتا ءبىز ءۇشىن قيىن كەزەڭدەردىڭ ءبىرى باستالادى. ەپيدەميا ەكى- ءۇش اپتادان كەيىن عانا شارىقتاۋ شەگىنە جەتۋى مۇمكىن دەپ وتىرمىز. سول سەبەپتى ءبىز اۋرۋحانالاردى جازعى مەزگىلگە قايتا بەيىمدەپ جاتىرمىز. ماسكەۋدەگى ەمحانالاردىڭ جۇمىسى ەسەلەپ ارتقان. نەگىزى ەپيدەميا شارىقتاۋ شەگىنە جەتكەنشە، قالادا ناۋقاستارعا ارنالعان 21 مىڭ جاتىن ورىن ورناتۋ جوسپارلانعان ەدى. الايدا قازىردىڭ وزىندە ورىن تاپشى. اۋرۋ بەلگىلەرى جەڭىل ناۋقاستار ۇيدە ەمدەلىپ جاتىر. بۇل جاعدايى اۋىر ادامدارعا ورىن بوساتۋ ءۇشىن قابىلدانعان شەشىم. رەسمي مالىمەت بويىنشا، قازىر ماسكەۋدە 6 مىڭنان اسا تۇرعىن ۇيلەرىندە ەمدەلىپ جاتىر.
مامانداردىڭ ايتۋىنشا، ەگەر جاعدايى ناشارلاپ كەتسە، ول ادامدار مىندەتتى تۇردە اۋرۋحاناعا جاتقىزىلادى. جەدەل رەسپيراتورلىق ۆيرۋستىق ينفەكسياعا شالدىققان ادامدار دا كوروناۆيرۋس جۇقتىرۋى مۇمكىن ناۋقاستار قاتارىنا جاتقىزىلادى. ماسكەۋدەگى جەدەل شتاب وكىلدەرى وسىلاي دەيدى. نەگىزى قالاداعى بىرنەشە اۋرۋحانانىڭ باس دارىگەرلەرى دە كوروناۆيرۋستى جۇقتىرعانى بەلگىلى بولدى. مەديتسينالىق قىزمەتكەرلەر اراسىندا جاڭا دەرەكتەر وزگە وڭىرلەردە دە تىركەلىپ جاتىر.
ءۇندىستانداعى جاعداي دا كۇردەلى. مۇندا سوڭعى تاۋلىكتە كوروناۆيرۋستى مىڭنان اسا ادام جۇقتىرعان. وسىلايشا، ناۋقاستار سانى 13 مىڭنان اسادى. الايدا ساراپشىلار ناقتى كورسەتكىشتەر الدەقايدا جوعارى بولۋى مۇمكىن دەيدى. سەبەبى مۇندا ۆيرۋستى انىقتايتىن تەست تاپشى. ەلدە كارانتين 3 - مامىرعا دەيىن ۇزارتىلدى. الايدا شارانىڭ داعدارىسقا اكەلەتىن ءتۇرى بار. سەبەبى مىڭداعان تۇرعىن تابىسىنان قاعىلعانىن ايتىپ شاعىمدانىپ وتىر.
حارش ماندەر، قوعام قايراتكەرى:
- بىزگە ۆيرۋستان ولەسىڭدەر دەيدى، ءبىراق وعان دەيىن اشتىقتان ولەتىن سەكىلدىمىز. بۇل الەمدەگى ەڭ اۋقىمدى كارانتين عانا ەمەس، سونىڭ ىشىندەگى ەڭ قاتالى دا. نەگىزى قازىر تۇرمىسى تومەن تۇرعىندار تۇراتىن لاشىقتارداعى جاعداي اسا كۇردەلى.
مۇندا ناۋقاستار سانى ارتىپ بارادى. وسى لاشىقتاردا حالىق تىعىزدىعى بويىنشا ءبىر شارشى شاقىرىمعا 250 مىڭ ادامنان كەلەدى ەكەن. سوندىقتان ماماندار ۆيرۋستىڭ تەز تارالۋىن توقتاتپاسا، جاعداي لەزدە باقىلاۋدان شىعىپ كەتەدى دەپ ەسكەرتىپ وتىر.
www.24.kz