قازىرگى ۋاقىتتاعى اقپاراتقا سايكەس، قاراعاندى قالاسى ماڭىندا اپاتقا ۇشىراعان ميگ-31 جويعىش ۇشاعىن پودپولكوۆنيك ا. قۇرمانعاليەۆ پەن پودپولكوۆنيك ي. گاۆريلكونىڭ باسقارعاندارى بەلگىلى بولدى. ولار تاجىريبەلى اسكەري ۇشقىشتار.
ا. قۇرمانعاليەۆتىڭ جالپى ۇشۋ ۋاقىتى 888 ساعات بولسا، ال ي. گاۆريلكونىكى -1161 ساعاتتى قۇرايدى. اپات ورنىنا قازاقستان اسكەري-اۋە كۇشتەرىنىڭ جەردەگى ىزدەستىرۋ-قۇتقارۋ قىزمەتى ءبىرىنشى بولىپ كەلگەن.
ۇشقىشتارعا وقيعا ورنىندا العاشقى مەديتسينالىق كومەك كورسەتىلگەننەن كەيىن، ولار قاراعاندى قالاسىنىڭ اۋرۋحاناسىنا ەۆاكۋاتسيالاندى. قازىرگى كەزدە ۇشقىشتارعا قاجەتتى مەديتسينالىق كومەك كورسەتىلۋدە.
دارىگەرلەر بىرەۋىنىڭ جاعدايىن قاناعاتتانارلىق، ەكىنشىسىنىكى ورتاشا اۋىرلىقتا دەپ باعا بەرۋدە.
قورعانىس مينيسترلىگىنەن تاعايىنداعان كوميسسيا اۆياتسيالىق وقيعانىڭ ءمان-جايىن انىقتاۋعا كىرىستى.
اپات ورنىنا اۋە قورعانىس كۇشتەرىنىڭ باس قولباسشىسى مەن اسكەري-اۋە كۇشتەرىنىڭ قولباسشىسى ۇشىپ كەتتى.
ايتا كەتەيىك، اپاتقا ۇشىراعان ۇشاق 1991-جىلى شىعارىلعان بولاتىن. بۇل ميگ-31 ۇشاعىنىڭ قازاقستانداعى ءتورتىنشى رەت اپاتقا ۇشىراۋى.
بۇدان بۇرىنعى وقيعالار 2007، 2008، 2013-جىلدارى بولاتىن.
ەسكە سالساق، كەشە قاراعاندى وبلىسىندا اسكەري ۇشاقتىڭ اپاتقا ۇشىراعانى تۋرالى حابارلادىق. قۇلاعان ۇشاقتان ەكى سارباز زارداپ شەكتى.