جاڭا زەرتحانا كوروناۆيرۋستىق ينفەكسيا اۋرۋىنا اۋقىمدى تەستىلەۋ جۇرگىزۋگە كومەكتەسەدى. ازىرشە، قاۋىپ توبىنداعى ادامدار - مەديتسينا قىزمەتكەرلەرى، ۆيرۋستىق ينفەكسياسى بار جۇكتى ايەلدەر، تىنىس الۋ ورگاندارىنىڭ سوزىلمالى اۋرۋلارى بار ديسپانسەرلىك ەسەپتە تۇرعان ادامدار، مەديتسينالىق- الەۋمەتتىك مەكەمەلەردىڭ قامقورلىعىنداعى ادامدار، كازارمالىق رەجيمدە تۇرعان اسكەري قىزمەتشىلەر اناليزدەردى تاپسىرا الادى.
قاراعاندى مەديتسينا ۋنيۆەرسيتەتى COVID دامۋ مەحانيزمدەرىنە جانە وسى اۋرۋعا يممۋنيتەتتى قالىپتاستىرۋعا ارنالعان عىلىمي زەرتتەۋلەردە بىرەگەي مولەكۋلالىق- گەنەتيكالىق زەرتحانانى ىسكە قوسۋدى جوسپارلاپ وتىر. وڭىردە پۋلمونولوگيالىق ورتالىقتار جۇمىس ىستەيدى. بۇلاردىڭ جۇمىسىنىڭ ارقاسىندا 14 كوروناۆيرۋستى ينفەكسيامەن اۋىراتىندار انىقتالدى. ال ولاردىڭ بارلىعى سانيتارلىق- ەپيدەميولوگيالىق نورمالاردى ساقتاي وتىرىپ ينفەكسيالىق ستاتسيونارلارعا اۋىستىرىلدى.
قاراعاندى وبلىسىنا ۆيرۋسپەن كۇرەس جۇرگىزۋدەگى تاجىريبەسىمەن ءبولىسۋ ءۇشىن قىتايدان دارىگەرلەر كومانداسى كەلدى. توپ قۇرامىندا ينفەكسيونيستەر، پۋلمونولوگتار، نەفرولوگتار، قارقىندى تەراپيا دارىگەرلەرى جانە باس مەدبيكە بار. قىتاي ماماندارى قاراعاندى مەديتسينا ۋنيۆەرسيتەتىندە كونفەرەنسيا وتكىزدى. سونداي- اق شەتەلدىك ماماندار دارىستەر وقيدى جانە شەبەرلىك ساباقتار وتكىزەدى، تاجىريبەلەرىمەن بولىسەدى.
«قازاقستاننىڭ دەنساۋلىق ساقتاۋ جۇيەسى جاقسى دەڭگەيدە، دارىگەرلەردىڭ كاسىبي دەڭگەيى جوعارى، زاماناۋي جابدىقتارمەن جاراقتاندىرىلۋى ءتاۋىر. قازىر جۇقپالى اۋرۋمەن كۇرەستە ەڭ باستىسى - الدىن الۋ، بۇل جاعدايدا قازاقستاننىڭ بارلىق حالقى ت ج جانە كارانتين رەجيمىنىڭ شارتتارىنا قۇلاق اسۋ كەرەك»، - دەدى قىتاي دەلەگاتسياسىنىڭ مۇشەسى دارىگەر لۋ چەن. دەلەگاتسيا قاراعاندىدا 18 - ساۋىرگە دەيىن بولادى. قىتاي دارىگەرلەرى قاشىقتان كەڭەس بەرۋگە قاتىسادى جانە كوروناۆيرۋستىق ينفەكسيامەن كۇرەسۋ ءۇشىن مەديتسينالىق مەكەمەلەردىڭ جۇمىسىن ءتيىمدى ۇيىمداستىرۋ بويىنشا كەڭەستەر بەرەدى.
اۆتور: اگاتا مۋحامەدجانوۆا