قازاقپاراتتا ونلاين- كونسەرت جالعاسادى: ساحا رەسپۋبليكاسىنىڭ تانىمال ءداستۇرلى ءانشىسى

نۇر- سۇلتان. قازاقپارات - ساحا (ياكۋتيا) رەسپۋبليكاسىنىڭ تانىمال ءداستۇرلى ءانشىسى، الەمنىڭ ۆيرتۋوز- حومۋسشىسى يۋليانا ۆيسساريونوۆنا كريۆوشاپكينا (ساحناداعى اتى دۇرۇيەەنە) ۇيدەگى ونلاين كونسەرتتى جالعاستىرادى.

قازاقپاراتتىڭ YouTube ارناسىنان كورسەتىلەتىن ونلاين- كونسەرتتە دۇرۇيەەنە حومۋستا ويناپ، ءوزىنىڭ تاماشا تۋىندىلارىن تىڭدارمانعا ۇسىنادى. 16 - ءساۋىر كۇنى كەشكى ساعات 20:00-دە ۇيدەگى كونسەرتتى مىنا سىلتەمەدەن تاماشالاڭىز.

يۋليانا كريۆوشاپكينا- دۇرۇيەەنە - «الەمنىڭ ۆيرتۋوز- حومۋسشىسى» اتاعىن يەلەنگەن ەتنو- ءانشى، مۋزىكانت. ساحا (ياكۋتيا) رەسپۋبليكاسىنىڭ مەملەكەتتىك ەسترادا تەاترىنىڭ ءارتىسى- ۆوكالشىسى.

يۋليانا العاشىندا «ايارحاان» ەتنو توبىندا ونەر كورسەتىپ تانىلعان. ءبىرقاتار حالىقارالىق فەستيۆالدارعا قاتىسىپ، «world music» تىڭدارماندارىن اۋەن مەلوديكاسىمەن باۋرادى. يۋليانا ونىڭ قۇرامىندا كوپتەگەن ەلدەردە ءتىرى، ەتنيكالىق مۋزىكا فەستيۆالدارىنىڭ گران- پري، لاۋرەات، حەد- لاينەرلەرى اتانعان. ول انشىلىگىمەن قاتار، حومۋستىڭ سۇيەمەلدەۋىمەن وسۋوحاي، تويۋك، دەگەرەن سەكىلدى فولكلورلىق اۋەندەردى ورىندايدى. ونىڭ داۋىسى مەن حومۋستا ويناۋى كەرەمەت ۇيلەسىپ، ادامنىڭ بويىندا عاجايىپ شاتتىق سەزىمىن وياتادى. ءوزى دە ونەر كورسەتكەندە مۋزىكاسىن «ءتىرىلتۋ» ءۇشىن تۇرلەنە تۇسەدى.

يۋليانا ساحا حالقىنىڭ مادەنيەتىمەن تانىستىرىپ قانا قويماي، دەگەرەن ستيلى مەن حومۋس دىبىسىنىڭ ۇيلەسىمىنەن باسقا حالىقتاردىڭ ۇلتتىق اسپاپتارىن، ءان ستيلدەرىنىڭ دىبىستالۋىن قوسىپ، تاجىريبە جاساپ، جاڭا وبرازداردى ىزدەيدى.

ەسكە سالايىق، بۇدان بۇرىن قازاقپاراتتا تۇركيالىق ءانشى، كومپوزيتور، تۇركى حالىقتارىنىڭ مۋزىكاسىن زەرتتەۋشى، «تۇرىك الەمىنىڭ سازدارى» ءانسامبلىنىڭ كوركەمدىك جەتەكشىسى يرفان گيۋردال قازاق جۇرتشىلىعىنا ارناپ ونلاين- كونسەرت وتكىزگەن بولاتىن.