تولىق مالىمەت ق ر پرەزيدەنتى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيا حالىقتى قونىستاندىرۋ سالاسىنداعى ب ۇ ۇ قورىمەن بىرىگىپ دايىنداعان جادىنامادا ايتىلعان، دەپ حابارلايدى قازاقپارات.
ەلدە ەڭگىزىلگەن توتەنشە جاعداي مەن كارانتين كەزىندە ايەلدەر وتباسىندا قاتىگەز قارىم- قاتىناسقا ۇشىراۋى مۇمكىن.
ب ۇ ۇ مالىمەتتەرى بويىنشا، كوپتەگەن مەملەكەتتە كوروناۆيرۋس ىندەتىنە بايلانىستى كارانتين شارالارى ەڭگىزىلگەننەن كەيىن ۇيدەگى زورلىق-زومبىلىقتىڭ كوبەيۋى بايقالۋدا.
«تۇرمىستىق زورلىق- زومبىلىقتان زارداپ شەككەندەر ءۇشىن ءىس-قيمىل الگورتيمى» اتالاتىن جادىنامادا كەلەسىدەي كەڭەستەر بەرىلگەن:
1. زورلىق-زومبىلىق تۋرالى اۋىزشا ارىزبەن 102 ءنومىرى بويىنشا دەرەۋ پوليتسياعا حابارلاسىڭىز. نەمەسە qamqor.gov.kz پورتالى ارقىلى ونلاين-ارىز بەرىڭىز. قۇقىق بۇزۋشىعا شارا قولدانۋ ءۇشىن پوليتسيا قىزمەتكەرلەرىنىڭ تۇرمىستىق زورلىق- زومبىلىق جاسالعان جەرگە كەلۋلەرىن تالاپ ەتۋگە قۇقىلىسىز.
2. جاراقات العان جاعدايدا «103» ءنومىرى بويىنشا جەدەل جاردەم شاقىرىڭىز. پوليتسيا قىزمەتكەرىنەن سوت-مەديتسينالىق كۋالاندىرۋعا جولداما الىڭىز.
3. بالالارعا، جاستارعا جانە زورلىق-زومبىلىق كورىپ وتىرعان ادامدارعا ارنالعان تاۋلىك بويعى ۇلتتىق ءبىرىڭعاي سەنىم تەلەفوندارىنا (تەگىن): 150 نەمەسە 77081060810 نومىرىنە (WhatsApp) نەمەسە www.telefon150.kz سايتىنا حابارلاسىڭىز.
ول جەردە سىزگە پسيحولوگيالىق جانە قۇقىقتىق كومەك كورسەتىپ، ۋچاسكەلىك ينسپەكتورلاردىڭ، داعدارىس ورتالىقتارىنىڭ جانە باسقا دا قاجەتتى ۇيىمداردىڭ بايلانىس تەلەفوندارىن بەرەدى. حابارلاسقان ادام تۋرالى مالىمەتتەردىڭ قۇپيالىلىعىنا كەپىلدىك بەرىلەدى.
4. بارلىق وڭىردە تۇرمىستىق زورلىق-زومبىلىق قۇرباندارىنا ارنالعان داعدارىس ورتالىقتارى جۇمىس ىستەيدى. ءومىرىڭىز بەن دەنساۋلىعىڭىزعا ءقاۋىپ تونگەن جاعدايدا وسى ورتالىقتاردان باسپانا سۇراي الاسىز.
5. ءار ايماقتا ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسيالار جۇمىس ىستەيدى. ول جەردە سىزگە كەڭەس بەرىپ، قاجەتتى قولداۋ كورسەتىلەدى.