«كوروناۆيرۋس ينفەكتسياسىن جۇقتىرعان مەديتسينالىق ماماندارعا تولەماقى تاعايىنداۋ بويىنشا دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى بىرلەسكەن بۇيرىق شىعاردى. وندا كوروناۆيرۋسپەن كۇرەسكە تىكەلەي قاتىسقان ماماندارعا تولەماقى بەرۋ الگوريتمى جازىلعان. باستى نەگىزدەمە - ماماننىڭ اۋرۋ جۇقتىرۋ فاكتىسىن حابارلاۋ»، - دەدى ۆيتسە-مينيستر ورتالىق كوممۋنيكاتسيالار قىزمەتىندە وتكەن بريفينگىدە.
حابارلاۋدان كەيىن ينفەكتسيالىق اۋرۋ وشاعىن انىقتاۋ ءۇشىن ەپيدەميولوگيالىق تەكسەرۋ جۇرگىزىلەدى.
«تەكسەرۋ ناتيجەسى ارنايى كوميسسياعا جىبەرىلەدى. بۇل كوميسسيا قۇرامىنا ەڭبەك ينسپەكتسياسى وكىلدەرى، جۇمىس بەرۋشى وكىلى، سانيتارلىق-ەپيدەميولوگيالىق ۇيىم وكىلدەرى جانە قىزمەتكەردىڭ نەمەسە كاسىپوداق ۇيىمىنىڭ وكىلدەرى كىرەدى. اتالعان بۇيرىق كۇشىنە ەندى جانە جاقىن ارادا جۇمىسىن باستايدى»، - دەدى ل. اقتايەۆا.
ۆيتسە-ءمينيستردىڭ ايتۋىنشا، قازىرگى ۋاقىتتا قازاقستاننىڭ 13 وڭىرىندە 370 مەديتسينالىق قىزمەتكەر COVID-19 جۇقتىرعان. ولاردىڭ 28 پايىزى - دارىگەرلەر، 48 پايىزى - مەدبيكەلەر جانە 23 پايىزى - كىشى مەديتسينالىق قىزمەتكەرلەر.
ەسكە سالا كەتسەك، ناۋرىز ايىنىڭ سوڭىندا ت ج رەجيمىن قامتاماسىز ەتۋ جونىندەگى مەملەكەتتىك كوميسسيا ەپيدەمياعا قارسى شارالارعا اتسالىسقان مەديتسينالىق قىزمەتكەرلەرگە ۇستەمەاقى تاعايىندادى.
قاۋىپتىلىگى بويىنشا ءبىرىنشى توپ ماماندارىنىڭ جالاقىسىنا ايىنا 850 مىڭ تەڭگە ۇستەمەاقى قوسىلادى. ەكىنشى توپ - پروۆيزورلىق ستاتسيونار مەن جەدەل جاردەم قىزمەتتەرىنىڭ دارىگەرلەرى، ورتا جانە كىشى مەديتسينا قىزمەتكەرلەرى. ولاردىڭ ۇستەمەاقىسى ايىنا 425 مىڭ تەڭگەنى قۇرايدى.
ءۇشىنشى توپقا كارانتيندىك ستاتسيونار دارىگەرلەرى، ورتا جانە كىشى مەديتسينا قىزمەتكەرلەرى، سانيتارلىق دارىگەرلەر، جەدەل جاردەم جۇرگىزۋشىلەرى جانە تاعى باسقالارى كىرەدى.
ولار ايىنا 212 مىڭ تەڭگە ۇستەمەاقى الادى.