ولار اسكەري قىزمەتشىلەرىن جاندارىنا ەرتىپ قالا كوشەلەرىن شولىپ، بەيساۋات جۇرگەن تۇرعىندارعا كارانتين رەجيمىنىڭ تالاپتارىن ءتۇسىندىرىپ، تارتىپكە بويۇسىنباعانداردى جازاعا تارتۋعا ءماجبۇر.
بۇگىن ب ا ق وكىلدەرىمەن قاتار قازاقپارات تىلشىلەرى دە قالا كوشەلەرىن شولۋعا شىققان پوليتسيا قىزمەتكەرلەرىمەن بىرگە رەيدكە قاتىسىپ قايتقان ەدى. تىلشىلەر ىلەسكەن نۇر- سۇلتان قالاسى سارىارقا اۋداندىق پوليتسيا باسقارماسىنىڭ جەرگىلىكتى پوليتسيا قىزمەتى ءبولىمىنىڭ باستىعى، پوليتسيا پودپولكوۆنيگى مارات ومىربايەۆ جول بويى بىزدەرگە كۇندەلىكتى جۇمىستارى جايىندا اقپارات بەرۋگە تىرىستى.
«نۇر- سۇلتان قالاسىنىڭ اۋماعىندا كۇندەلىكتى تاۋلىك بويى رەجيمدە قوعامدىق ءتارتىپتى قورعاۋ، كارانتين رەجيمىن ساقتاۋ ماقساتىندا اۋلا اۋماقتارىندا، كوشەلەردە جاياۋ جاساق شولىپ شىعادى. نۇر- سۇلتان قالالىق پوليتسيا دەپارتامەنتى قالا اۋماعىندا كوروناۆيرۋس ىندەتىنىڭ تارالۋىنا جول بەرمەۋ، ازاماتتاردىڭ قاۋىپسىزدىگىن قامتاماسىز ەتۋ ءۇشىن بارلىق قاجەتتى شارالاردى قابىلداپ جاتىر» ، - دەدى ول.
پوليتسيا قىزمەتكەرلەرى كۇندەلىكتى قالا اۋماعىنداعى جۇمىسىنا كىرىسپەستەن بۇرىن توپقا بولىنەدى. توپتا ءبىر پوليتسيا قىزمەتكەرى مەن 2 اسكەري قىزمەتشى بولادى. ولارعا قالا اۋماعىندا ارنايى بولىنگەن اۋماقتاعى قوعامدىق ءتارتىپتى، كارانتين رەجيمىنىڭ ساقتالۋىن قامتاماسىز ەتۋ جۇكتەلگەن. قولدارىندا ارنايى جۋرنال مەن پلانشەت بار. توپ كوشەدە، اۋلادا بەيساۋات جۇرگەن ادامداردى توقتاتىپ، نە ماقساتپەن، قايدان كەلە جاتقاندارىن، قايدا بارا جاتقاندارىن انىقتاۋعا تىرىسادى. ولاردىڭ اتى- جوندەرىن جۋرنالعا نە بولماسا بىردەن پلانشەتكە ءتۇسىرىپ الادى. جالپى قالا بويىنشا 26 ءموبيلدى پوست ورناتىلعان.
«بارلىعىن دا قاداعالاپ وتىرمىز. ايتالىق، ءبىر ادام سارىارقا اۋدانىندا تۇرعانىمەن الماتى اۋدانىندا ءجۇر دەلىك. ال وعان رۇقسات جوق. سول سەبەپتى تۇرعىننىڭ دەرەكتەرىن جازىپ الىپ، مالىمەتتەر بازاسىنان تەكسەرەمىز. ءبىرىنشى جولى كەزىككەندە تۇسىندىرەمىز، ايتامىز. ءوزىمىز ءۇشىن كەرەك شارا ەكەندىگىن تۇسىندىرۋگە تىرىسامىز. ارينە، بۇلقان- تالقان اشۋلانىپ، تارتىپكە باعىنعىسى كەلمەيتىن ادامدار دا كەزىگىپ جاتادى. ونداي ساتتە باعىنباسا، بارىنشا قارسىلىق تانىتقا اكىمشىلىك سيپاتتاعى شارا قولدانۋعا ءماجبۇر بولامىز» ، - دەدى مارات ومىربايەۆ.
كارانتين كەزىندە قويىلاتىن تالاپ تا، تالاپقا باعىندايتىندارعا بەرىلەتىن جازا دا قاتاڭ. بەيساۋات كوشەدە قىدىرامىن دەپ 10 ايلىق ەسەپتىك كورسەتكىش كولەمىندە ايىپپۇل الىپ، ءتىپتى بىرنەشە تاۋلىك كۇنىڭىزدى تەمىر توردا وتكىزۋىڭىز بەك مۇمكىن. ايتالىق، تۇرعىننىڭ كوشەدە اسا قاجەتتىلىك بولماسا دا جۇرگەنى انىقتالاتىن بولسا، وندا ول ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 476-بابىنا سايكەس اكىمشىلىك جاۋاپقا تارتىلادى. ال بۇل باپتا جازا باسقان جانعا 10 ايلىق ەسەپتى كورسەتكىش كولەمىندە ايىپپۇل نەمەسە 15 تاۋلىككە اكىمشىلىك قاماۋعا الۋ قاراستىرىلعان.
«جەدەل شتابتىڭ شەشىمى بار. وندا كارانتين رەجيمىن ساقتاۋ ءتىزىلىمى ناقتى كورسەتىلگەن. ياعني، ازاماتتار ۇيلەرىنە بارىنشا جاقىن ورنالاسقان دۇكەنگە عانا بارۋلارى ءتيىس. ارينە، ءتۇرلى جايتتاردىڭ دا ورىن الاتىندىعىن بىلەمىز. ماسەلەن، ءسىز ءبىر اۋداندا، ال ەم الىپ جۇرگەن ءتىس ەمحاناڭىز باسقا اۋداندا ورنالاسقان دەلىك. مۇنداي جاعدايدا ءسىز سول ەمحانادان ەمدەلىپ جۇرگەندىگىڭىز تۋرالى انىقتامامەن وعان ەش كەدەرگىسىز بارا الاسىز» ، - دەدى پوليتسيا پولكوۆنيگى.
جالپى، رەيد بارىسىندا تۇرعىن ءۇي اۋلالارىنداعى بالالار جانە سپورت الاڭدارىندا ويىن قىزىعىنا بەرىلگەن بالالار كوزگە تۇسكەن جوق. دەگەنمەن، شولعىنشى پوليتسيا قىزمەتكەرلەرى كەزدەسكەن تۇرعىندارعا كارانتين كەزىندە قانداي قاۋىپسىزدىك شارالارىن ۇستانۋ كەرەكتىگىن بارىنشا تۇسىندىرۋگە تىرىستى.