باسپا ءسوز قىزمەتىنىڭ مالىمەتىنشە، توتەنشە جاعداي ەنگىزىلۋىنە بايلانىستى حالىققا قىزمەت كورسەتۋ ورتالىقتارى مەن كوشى- قون قىزمەتى ورتالىعى ۋاقىتشا جابىلدى.
بۇل شارا كوروناۆيرۋس ينفەكسياسى تارالماۋى ءۇشىن قولعا الىنعان شارا. كوشى-قون جەلىسى بويىنشا مەملەكەتتىك قىزمەتتەر حالىققا تەك «ەلەكتروندىق ۇكىمەت» پورتالى ارقىلى كورسەتىلەدى. مامانداردىڭ ايتۋىنشا، ازاماتتاردىڭ اراسىندا اسا سۇرانىسقا يە قىزمەتتەردىڭ ءبىرى - ەل تۇرعىندارىن تۇرعىلىقتى جەرى بويىنشا تىركەۋ جانە تىركەۋدەن شىعارۋ.
جىل باسىنان وسى قىزمەتتى الۋ ءۇشىن 12 مىڭنان استام سولتۇستىكقازاقستاندىق جۇگىنگەن. بۇل - كوشى- قون قىزمەتى بولىنىستەرى كورسەتكەن قىزمەت كولەمىنىڭ ۇشتەن ءبىرى. 7,5 مىڭ ادام بۇل قىزمەتتى حالىققا قىزمەت كورسەتۋ ورتالىقتارىنا بارماي-اق ونلاين- رەجيمىندە «ەلەكتروندىق ۇكىمەت» پورتالى ارقىلى العان.
«قازىرگى ۋاقىتتا ءبىرقاتار قىزمەت تۇرلەرىن ونلاين- رەجيمگە كوشىرۋ بويىنشا جۇمىستار اتقارىلۋدا. ازىرگە بۇل پروتسەسس اياقتالعان جوق. بۇدان بولەك، ادامداردى جاۋاپكەرشىلىك تۋرالى ماسەلە الاڭداتادى. كارانتين كەزەڭىندە تەحنيكالىق سەبەپتەرگە بايلانىستى قۇجاتتارىن رەسىمدەپ ۇلگەرمەگەندەر اكىمشىلىك جاۋاپقا تارتىلمايدى»، - دەيدى سق و پ د كوشى-قون قىزمەتى باسقارماسىنىڭ باستىعى تالعات ءابىلوۆ.
جالپى جىل باسىنان وبلىستا كوشى- قون قىزمەتى حالىققا 36 مىڭنان استام مەملەكەتتىك قىزمەت كورسەتكەن.