ادامزات تىرشىلىگىندەگى ارەكەتتەر ازايعان سايىن اتموسفەرا تازارىپ، سۋ تۇنىق بولا باستاعان.
ال الماتىنىڭ اۋاسى قانشالىقتى تازاردى؟
بۇل تۋرالى وتاندىق ەكولوگتار ايتىپ بەردى، دەپ حابارلايدى قازاقپارات ءتىلشىسى.
الماتى پوليتسيا دەپارتامەنتىنىڭ رەسمي مالىمەتتەرىنە سايكەس، قالادا كولىكتەر سانى بەس ەسە ازايدى. ەكولوگتار مۇنىڭ قالالىق ورتاعا جانە ەكولوگياعا، اسىرەسە، تۇرعىندار ءجيى شاعىمداناتىن اۋا ساپاسىنا قالاي اسەر ەتكەنىن ايتتى.
ەكوبەلسەندى تيمۋر ەلەۋسىزوۆتىڭ سوزىنشە، اۋا تازا بولا باستادى جانە بۇكىل قالادا اتموسفەرا بىرنەشە سەبەپتەرگە بايلانىستى جاقسارىپ كەلەدى.
«مەگوپوليستە كولىك قوزعالىسى ازايعالى اۋا ءبىرشاما تازارىپ قالدى. بۇل بىردەن بايقالادى. ونىڭ قانشالىقتى تازارعانىن ايتا المايمىن. ويتكەنى مۇندا ارنايى داتچيكتەرمەن حيميالىق اناليز جاساۋ قاجەت. جالپى، اتموسفەرا وزگەردى، جاقسى ديناميكا بار. ءتىپتى ءجيى جاۋىپ جاتقان جاڭبىر دا الماتى ەكولوگياسىنا جاقسى اسەر ەتۋدە»، - دەيدى ول.
ءوز كەزەگىندە تازا كولىكتى دامىتۋ جونىندەگى ساراپشى ەلەنا ەرزاكوۆيچ كارانتيننىڭ اۋا ساپاسىنا قالاي اسەر ەتكەنى تۋرالى سۇراققا جاۋاپ بەرۋ مۇمكىن ەمەستىگىن اتاپ ءوتتى.
«داتچيكتى قولدانۋ ارقىلى كولىكتەردىڭ ەكولوگيانى لاستاۋعا قوساتىن ۇلەسى تۋرالى ەشكىم ناقتى ايتا المايدى. توتەنشە جاعداي كەزىندە ازايعان كولىك قوزاعالىسى ارقىلى دا انىقتاۋ مۇمكىن ەمەس. ول ۇلكەن كولەمدى مالىمەتتەردى قاجەت ەتەدى. قازىرگى ۋاقىتتا قالادا ءارتۇرلى ەكولوگيالىق ساناتتاعى قانشاما اۆتوكولىك بار. ولاردىڭ تەحنيكالىق جاعدايى قانداي، جانارمايدىڭ قاي ءتۇرىن قۇيادى، كۇنىنە قانشا شاقىرىم جۇرەدى؟ مىنە، وسىنىڭ بارلىعى ەسەپكە الىنۋى كەرەك. سوندىقتان مەن ءبىرازدان بەرى اۋانى لاستايتىن زاتتارعا قاتىستى داۋلارعا قاتىسپايمىن. قازىر قالا تۇرعىندارىنا وزدەرىنىڭ ۇلەستەرى مەن پروبلەمالارىن شەشۋ جولدارىن ۇعىنۋدىڭ قانشالىقتى ماڭىزدى ەكەنىن ءتۇسىندىرۋدى ءجون كورەمىن. كولىك جانە ەنەرگەتيكا سالاسى اراسىندا جاۋاپكەرشىلىكتى ءبولىسىپ، جاعدايدى ەكى باعىتتا جاقسارتۋ ءۇشىن جۇمىستى جالعاستىرۋ قاجەت دەپ ويلايمىن»، - دەيدى ساراپشى.
«قازگيدرومەت» ر م ك الماتى فيليالىنىڭ مالىمەتىنشە، اتموسفەرالىق اۋاعا مونيتورينگ 16 پوستتا جۇرگىزىلىپ وتىرادى. ونىڭ 11 ى اۆتوماتتى، 5 ەۋى قولمەن ىرىكتەلەدى. 31-ناۋرىز بەن 6 -ءساۋىر ارالىعىندا رۇقسات ەتىلگەن نورمادان اساتىن 117 جاعداي تىركەلدى.
اۆتور: الما مۇقانوۆا