بۇل سۇراققا ق ر د س م تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ ءتوراعاسى ليۋدميلا بيۋرابەكوۆا جاۋاپ بەردى، دەپ حابارلايدى قازاقپارات ءتىلشىسى.
«قازاقستاندا كوروناۆيرۋستى جۇقتىرۋ جاعدايى نەلىكتەن مەديتسينا سالاسىنىڭ قىزمەتكەرلەرى اراسىندا ءورشىپ بارادى؟ وسى ماسەلەنى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنە قاراستى دەپارتامەنتتەرى زەرتتەگەن بولاتىن. ماسەلەن بۇل رەتتە العاشقى جاعداي الماتى قالاسىنداعى بالالاردىڭ ينفەكسيالىق اۋرۋحاناسىندا تىركەلدى. سونداعى اۋماقتىق دەپارتامەنتتىڭ مالىمەتىنە سايكەس وندا مەديتسينا قىزمەتكەرلەرى ستاتسيوناردا تاۋلىك بويى جۇرگەن. ياعني ءدال سول كەزدە اۋىسىمنان كەيىن دارىگەردىڭ تۇراتىن ءارى دەمالاتىن ورىنى جاساقتالماعان. وسىلايشا دارىگەرلەر امالسىز ستاتسيوناردا قالۋعا ءماجبۇر بولعان» ، - دەدى ليۋدميلا بيۋرابەكوۆا و ك ق- دا ونلاين رەجيمدە وتكەن باسپا ءسوز ءماسليحاتىندا.
سونىمەن قاتار دارىگەرلەردىڭ جۇمىستان شارشاۋى، جۇمىستىڭ 10 ساعاتقا سوزىلۋى، كەي جاعدايدا جەكە ساقتىق قۇرالىمەن قامتىلماۋى نەمەسە ونى دۇرىس پايدالانباۋ جاعدايلارى دا انىقتالعان.
«قاراعاندى وبلىسىندا دا جۇمىس رەجيمىنىڭ بۇزىلۋ فاكتىسى تىركەلدى. ياعني دارىگەرلەر جۇمىس ورنىندا تاۋلىك بويى بولعان. ونداعى دارىگەرلەردىڭ دە كەيبىرى جەكە ساقتىق قۇرالدارىمەن جانە دەزينفەكسيالىق قۇرالمەن قامتاماسىز ەتىلمەگەن. اتىراۋ وبلىستىق اۋرۋحاناسىندا COVID-2019 اۋرۋى بويىنشا كۇدىكتى بولىپ تۇسكەن اياعى اۋىر ايەلگە دارىگەرلەر لايىقتى دەڭگەيدە ابايلاپ قاراماعان. مەديتسينا قىزمەتكەرلەرى وسىلايشا ءوزىن قورعاۋ ءتارتىبىن ورىنداماعان. نۇر- سۇلتانداعى كوروناۆيرۋستىڭ وشاعى سانالاتىن ءۇش مەديتسينالىق ۇيىمداعى (ونداعى دارىگەرلەر كوروناۆيرۋس جۇقتىرعان پاتسيەنتتەردى ەمدەۋگە جۇمىلدىرىلماعان) دارىگەرلەر باسقا جەردە كوروناۆيرۋس جۇقتىرعان ادامدارمەن بايلانىستا بولعان» ، - دەدى ول.
سونىمەن قاتار دەنساۋلىق ساقتاۋ ءمينيسترىنىڭ تاپسىرماسىمەن دارىگەر- ينفەكتسيونيستتىڭ شاعىمى بويىنشا «مەركە» ەمحاناسىنا تەكسەرۋ جۇرگىزىلگەن.
«شاعىم بويىنشا تۇسكەن فاكتتاردىڭ ءبارى دە راستالدى. اتالعان تەكسەرىستىڭ قورىتىندىسى بويىنشا جامبىل وبلىسىنىڭ باسشىلىعى ەمحانانىڭ باسشىسى مەن باس ەسەپشىسىنە قاتىستى شارا قابىلدادى. سول سەكىلدى باسقا وڭىرلەردە دە قاۋىپسىزدىك شارالارى ساقتالماعاندىقتان، ىستەردى سوت ورگاندارىنا جىبەردىك. الماتىداعى دەپارتامەنتتىڭ تەكسەرۋ قورىتىندىسىمەن سوت ورگاندارىنا 6 جەكە مەديتسينالىق ۇيىمنىڭ ليتسەنزياسىن توقتاتۋ تۋرالى شاعىم بەرىلدى»، - دەدى ول. ونىڭ ايتۋىنشا مەديتسينالىق قىزمەتكەرلەردىڭ اراسىنجا ۆيرۋس جۇقتىرۋدىڭ باستى سەبەپتەرى - مەديتسينالى ۇيىم باسشىلارى مەن جەرگىلىكتى اتقارۋشى ورگانداردىڭ پەرسونالدى قورعاۋ شارالارىن ورىنداماۋى، اتاپ ايتقاندا جەكە قاۋىپسىزدىك قۇرالىمەن، دەزينفەكتسيالىق قۇرالمەن قامتاماسىز ەتپەۋ، نۇسقاۋلىقتاردى دۇرىس جۇرگىزبەۋ، نىسانداردىڭ تەحنيكالىق جاي- كۇيى (تازا جانە لاس اۋماق دەپ بولىنبەۋى) ، ەڭبەك رەجيمىنىڭ بۇزىلۋى، سونداي- اق قاۋىپسىزدىك قۇرالدارىن دۇرىس پايدالانباۋ (كيۋ، شەشۋ) .
«كارانتين نىساندارىندا مەديتسينالىق قىزمەتكەرلەردىڭ دەمالۋ جاعدايلارىنىڭ شارتى مەملەكەتتىك كوميسسيانىڭ حاتتاماسىندا ناقتى كورسەتىلگەن بولاتىن. الايدا بۇل تاپسىرما بۇكىل ايماق ورىنداماي وتىر. تەك ءۇش ءوڭىر - اقتوبە، جامبىل جانە ب ق و وبلىستارى مەديتسينالىق قىزمەتكەر ءۇشىن وسىنداي جاعدايدى جاساۋدا» ، - دەدى ول.