ب ۇ ۇ باس حاتشىسى انتونيۋ گۋتەرريش بۇل مەرەكەلەر - بىرىگۋ ساتتەرى ەكەنىن اتاپ ءوتىپ، «بۇل - وتباسىلار بىرگە جينالاتىن ۋاقىت. قۇشاق اشىپ، قول الىساتىن، ادامداردى رۋحاني بىرىكتىرەتىن ۋاقىت. ءبىراق وسى جولى ادەتتەگىدەي ەمەس، ءبارى باسقاشا»، - دەدى ول.
«قازىرگى كەزدە ءبىز جولىمىزدى اپەندى، سيۋررەاليستيكالىق الەمدە تابۋعا تىرىسىپ كەلەمىز. ءۇنسىز كوشەلەر الەمىندە. ۆيترينالارى تاس جابىق الەمدە. بوساعان ءدىني عيماراتتار الەمىندە. جانە دە ۇرەي باسقان الەمدە»، - دەدى ا. گۋتەرريش.
د د ۇ- دا اتاپ وتىلگەندەي، ءدىن كوشباسشىلارى حالىقتىڭ قۇرمەتى مەن سەنىمىنە بولەنگەندىكتەن، ولار كوروناۆيرۋستىڭ تارالماۋىنا ماڭىزدى ۇلەس قوسا الادى.
«شىركەۋلەر، سيناگوگا جانە مەشىتتەردە ادامداردىڭ جينالۋىنا كەلسەك، ساراپشىلار مۇندا ۇلتتىق بيلىك بەرگەن كەڭەستەردى ۇستانۋعا شاقىرادى. بارۋعا رۇقسات ەتىلسە دە، قاتاڭ سانيتارلىق- گيگيەنالىق شارالاردى ساقتاۋ: ءبىر-بىرىنەن ءبىر مەتر جەردە ءجۇرۋ، ادامداردى ۇستاماۋ، ءبىر-ءبىرىن سۇيمەۋ جانە قاسيەتتى زاتتارعا ماڭدايدى تيگىزبەۋگە كەڭەس ەتىلەدى»، - دەلىنگەن اقپاراتتا.
د د ۇ مالىمەتىنشە، ەگەر ءدىني وشاقتارعا كەلۋشىلەردىڭ قاۋىپسىزدىگىن قامتاماسىز ەتۋ مۇمكىن بولماسا، ءدىني جورالعىلاردى وتكىزۋدەن باس تارتۋ نەمەسە ولاردى قاشىقتان وتكىزۋ مۇمكىندىگىن قاراستىرۋ كەرەك.
«رۋحاني كۇشتى بۇل كيەلى وقيعالاردىڭ وزىنەن الىپ، ولاردى ويلانۋ، ەسكە الۋ جانە جاڭارۋ مۇمكىندىگى رەتىندە پايدالانايىق. بۇل قاۋىپتى ۆيرۋسپەن كۇرەستە ايانباي تەر توگىپ جۇرگەن قاھارمان مەديتسينالىق قىزمەتكەرلەر، قالالار مەن كەنتتەرىمىزدە ەڭبەكتەنىپ جۇرگەن بارلىق ادامدار تۋرالى ويلارعا ەرەكشە ورىن قالدىرايىق»، - دەپ شاقىردى ب ۇ ۇ باس حاتشىسى.
سونداي-اق ول ۆيرۋستىڭ الدىندا دارمەنسىز قازىر سوعىس ايماقتارىندا جۇرگەن ادامدار، بوسقىندار تۋرالى ۇمىتپاۋدى سۇرادى.