كوروناۆيرۋسقا شالدىققانداردى ەمدەۋگە قانشا قارجى كەتەدى؟

مۇنى ق ح ر مەديتسينالىق قامسىزداندىرۋ باسقارماسىنىڭ مەديتسينالىق قىزمەتتەردى باسقارۋ جونىندەگى دەپارتامەنت باسشىسى سيۋن سيانتسزيۋن حابارلادى.

ونىڭ ايتۋىنشا، قىتايدا COVID-19 ينفەكتسياسىنا شالدىققان ءبىر ناۋقاستى ەمدەۋگە ورتا ەسەپپەن 21,5 مىڭ يۋان (3 مىڭ دوللاردان اسا)، ال جاعدايى اۋىر ناۋقاستى ەمدەۋگە 150 مىڭ يۋان (21,3 مىڭ دوللار) قارجى جۇمسالعان.

- كەيبىر جاعدايى تىم اۋىر ناۋقاستاردى ەمدەۋگە جۇزدەگەن مىڭ يۋاننان 1 ميلليون يۋانعا دەيىن قارجى جۇمسالعان كەزدەر بولدى، - دەيدى سيۋن سيانتسزيۋن.

قىتاي بيلىگى كوروناۆيرۋسپەن اۋىرعان ناۋقاستاردى ساۋىقتىرۋعا بارلىعى 1,48 ميلليارد يۋان (211 ميلليون دوللار) قارجى قۇرتقان.

بۇل شىعىننىڭ 990 ميلليون يۋان قارجىسىن مەديتسينالىق ساقتاندىرۋ جاپپاق. ياعني، قىتايدا COVID-19 ينفەكتسياسىمەن اۋىرعان 80 مىڭنان اسا ناۋقاستىڭ 52 مىڭعا جۋىعىن ساقتاندىرۋ ەسەبىنەن تولەنبەك.

دەگەنمەن بۇل ناقتى ەسەپ ەمەس. ويتكەنى قىتايدا كوروناۆيرۋس ىندەتى توقتاعانىمەن، ودان ەمدەلىپ جاتقان 1100 دەن اسا ناۋقاس بار، اراسىندا 139 ىنىڭ جاعدايى اۋىر.

ودان بولەك، دۇنيەجۇزىلىك دەنساۋلىق ساقتاۋ ۇيىمىنىڭ حابارلاۋىنشا، قىتايدا كوروناۆيرۋس جۇقتىرعاندار تاعى شىعا باستادى. 11- ءساۋىر كۇنى قىتايدا كوۆيد جۇقتىرعان 99 جاڭا ناۋقاس انىقتالدى. ولاردىڭ بارلىعى شەتەلدەن كەلگەندەر.

Massaget.kz