كوروناۆيرۋستىڭ جاڭا بەلگىلەرى اتالدى

نۇر -سۇلتان. قازاقپارات - فرانسۋز دارىگەرلەرى تەرى اۋرۋلارىنا بايلانىستى كوروناۆيرۋستىڭ جاڭا بەلگىلەرىن اتادى.

بۇل تۋرالى دەرماتولوگ-ۆەنەرولوگتاردىڭ ۇلتتىق وداعىنىڭ سايتىنداعى حابارلامادا ايتىلدى، دەپ حابارلايدى Stan.kz اقپارات اگەنتتىگى.

400 دەن استام مامان ۇيىمداستىرعان مەديتسينالىق قوعامداستىق كەيبىر جاعدايلاردا COVID-19 ۆيرۋسىن جۇقتىرعان ادامداردا ءجيى تەرىنىڭ قىزارۋى، ەسەكجەم مەن جالعان تەرى ءۇسۋى بولادى دەيدى. مامانداردىڭ ايتۋىنشا، مۇنداي تۇجىرىمدار ۆيرۋس ينفەكسياسىنىڭ كوپتەگەن جاعدايلارىن تالداۋ نەگىزىندە جاسالدى.

«ءبىز مەديتسينالىق قاۋىمداستىقتاعى ماماندارعا كوروناۆيرۋسپەن اۋىراتىن جاڭا ناۋقاستاردى مۇمكىندىگىنشە تەز تابۋى ءۇشىن وسى بەلگىلەر جايلى ەسكەرتەمىز»، - دەدى SNDV.

دارىگەرلەر اتالمىش بەلگىلەرى بار ازاماتتارعا مەديتسينالىق مەكەمەلەرگە بارۋدى ۇسىندى. ولاردىڭ ايتۋىنشا، ەگەر تەرىنىڭ پروبلەمالارى COVID-19-دىڭ بەلگىلەرى بولماسا دا، بۇل اۋرۋلاردى ەمدەۋ كەرەك.

بيلىك SNDV ەسەبىنە جاۋاپ بەردى. فرانسيانىڭ دەنساۋلىق ساقتاۋ باس ديرەكسياسىنىڭ باسشىسى دجەروم سالومون كوروناۆيرۋس جاعدايىندا دەرماتولوگيالىق سيمپتومداردى كورسەتەتىن ەشقانداي عىلىمي زەرتتەۋلەردى ءالى بىلمەگەنىن اتاپ ءوتتى. سونىمەن قاتار، سالومون ۆيرۋس مۋتانسيالانىپ، وزگەرگەن كەزدە ونىڭ جاڭا بەلگىلەرى تابىلۋى مۇمكىن ەكەنىن اتاپ ءوتتى.

بۇعان دەيىن Business Insider مەديتسينالىق مالىمەتتەرگە سۇيەنە وتىرىپ، كوروناۆيرۋستىڭ نەگىزگى بەلگىلەرىن اتادى. ولارعا تەمپەراتۋرانىڭ كۇرت كوتەرىلۋى، قىزبا، قۇرعاق جوتەل جانە تىنىس الۋ ناشارلاۋى كىردى.

قالتىراۋ، بۇلشىق ەتتەردىڭ اۋىرۋى COVID-19 ۆيرۋسىندا سيرەك كەزدەسەتىن بەلگىلەرى دەپ اتالدى، مۇرىن مەن تاماقتىڭ اۋرۋى جالپى سۋىقتىڭ بەلگىلەرىنە جاتقىزىلدى.