قاشىقتان وقىتۋ: وقۋشىلار مەن ۇستازدار قاجەتتى قۇرالدارمەن قامتاماسىز ەتىلەدى
«ءبىز قاشىقتان وقىتۋ جۇيەسىن ۇستانعان كەزدە باسقا دامىعان ەلدەردە دە ورىن الىپ جاتقان كەيبىر قيىندىقتار تۋىنداۋى مۇمكىن ەكەنىن جاقسى تۇسىنەمىز. ءبىر وتباسىندا بىرنەشە وقۋشى وقىعان جاعدايدا ءبىر كومپيۋتەر مەن ءبىر سمارتفوندى پايدالانۋدىڭ ىڭعايسىزدىعى تۋىنداۋى نەمەسە قاجەتتى تەحنيكانىڭ مۇلدەم بولماۋى دا مۇمكىن. كەيبىرەۋلەردە ينتەرنەت بايلانىسى دا جوق. پرەزيدەنت قاشىقتان وقىتۋدى ۇيىمداستىرۋ ءۇشىن بارلىق قاجەتتى شارالاردى قابىلداۋعا تاپسىرما بەردى. بۇل ماسەلەلەر ءقازىر ەرەكشە باقىلاۋدا. اكىمدىكتەرمەن بىرلەسە وتىرىپ، مەكتەپتەگى كومپيۋتەرلەردى وقۋشىلار مەن مۇعالىمدەرگە ۋاقىتشا پايدالانۋعا بەرۋ، ءتىپتى، قاجەت بولعان جاعدايدا، مەكتەپتەرگە قوسىمشا تەحنيكا (پلانشەتتەر نەمەسە كومپيۋتەرلەر) ساتىپ الىپ، ولاردى دا ۋاقىتشا پايدالانۋعا بەرۋ ماسەلەلەرىن قاراستىرۋدامىز. كەيبىر وڭىرلەر بۇل جۇمىستى باستاپ كەتتى»، - دەپ جازدى مينيستر الەۋمەتتىك جەلىدەگى پاراقشاسىندا.
سونىمەن قاتار ول شالعايداعى اۋىلداردا وقۋشىلاردى وقىتۋعا قاتىستى تۇسىنىك بەردى. «ەپيدەميولوگيالىق احۋالعا قاراي، شالعايداعى اۋىلدىق ەلدى مەكەندەردە ورنالاسقان شاعىن جيناقتى مەكتەپتەردە (80-گە جۋىق بالا وقيتىن) وقىتۋدى ءداستۇرلى فورماتتا جالعاستىرۋ مۇمكىندىگىن قاراستىرۋدامىز، تاعى ءبىر مارتە اتاپ ايتامىن - تەك قاراستىرۋدامىز. بۇل ماسەلە بويىنشا تۇپكىلىكتى شەشىم ءالى قابىلدانعان جوق، بۇل ماسەلە كانيكۋل اياقتالعانشا شەشىلەدى. ال ازىرشە ولار دا قاشىقتان وقىتۋعا بەلسەندى دايىندالۋدا»، - دەدى ا. ايماعامبەتوۆ.
وسى ورايدا ۆەدومستۆو باسشىسى جاڭا رەجىمدە جۇمىس ىستەۋ پەداگوگتەر ءۇشىن دە، بالالار ءۇشىن دە وڭاي شارۋا ەمەس ەكەنىن، ءبىراز كۇش- قۋاتتى تالاپ ەتەتىنىن جەتكىزدى.
«بۇل - وتاندىق ءبىلىم بەرۋ جۇيەسى ءۇشىن ۇلكەن سىن ەكەنى راس. ءبىز باستاپقى كەزەڭدە وقۋشىلاردىڭ اتا- انالارى تاراپىنان دا، پەداگوگتەر تاراپىنان دا كوپ سىن ايتىلاتىنىنا دايىنبىز جانە ءارقاشان اشىق ديالوگقا شاقىرامىز. اتا- انالار، پەداگوگتەر مەن وقۋشىلار اراسىنداعى پىكىرتالاستى مۇقيات قاداعالاپ وتىرامىز جانە قاشىقتان وقىتۋدىڭ قول جەتىمدىلىگىن ارتتىراتىن ءتيىمدى شارالاردى قابىلداۋعا دايىنبىز. قانداي دا ءبىر پروبلەما تۋىنداسا، ءسىز ءارقاشان ءبىلىم جانە عىلىم مينيسترلىگىنە حابارلاسا الاسىز. ءبىز پروبلەماڭىزدى شەشۋگە كومەكتەسۋگە تىرىسامىز. بۇل رەتتە ۇلاعاتتى ۇستازدارىمىزعا العىسىمدى بىلدىرگىم كەلەدى! قيىن كەزەڭگە قاراماستان، كوپتەگەن مۇعالىمدەر جاعدايعا بەيىمدەلىپ، ءوز مىندەتىن لايىقتى اتقارۋدى جالعاستىرۋدا. ەلىمىز مۇنداي كاسىبي دەڭگەيدەگى ماماندارىمەن ماقتانا الادى. مەن بىرلەسكەن كۇش- جىگەرىمىزدىڭ ارقاسىندا وسى كەزەڭدى ابىرويمەن ەڭسەرە الاتىنىمىزعا شىن جۇرەكتەن سەنەمىن»، - دەدى اسحات ايماعامبەتوۆ.
بۇدان بۇرىن حابارلانعانداي، مينيستر ۋاقىتشا قاشىقتان وقىتۋ قالاي جۇرگىزىلەتىنىن تۇسىندىرگەن بولاتىن.
اۆتور: رۋسلان عابباسوۆ