كوروناۆيرۋستان قايتىس بولعانداردى جەرلەۋ تۋرالى ارنايى قاۋلى شىعادى

بۇل تۋرالى ق ر اقپارات جانە قوعامدىق دامۋ ءمينيسترى داۋرەن ابايەۆ «حابار 24» تەلەارناسىنىڭ تىكەلەي ەفيرىندە مالىمدەدى.

«كوروناۆيرۋستان ادام قايتىس بولۋىنا بايلانىستى جۋرناليستەر مارقۇمدى قالاي جەرلەۋ كەرەكتىگى تۋرالى سۇراپ جاتىر. بۇگىن كەشكە نەمەسە ەرتەڭ تاڭەرتەڭ باس سانيتارلىق دارىگەردىڭ رەسمي قاۋلىسى شىعادى. وندا قاتاڭ ساقتالۋى كەرەك ەرەجەلەر كورسەتىلەدى. دارىگەرلەر ايتقان تالاپتاردى قاتاڭ ساقتاۋ قاجەتتىگى تۋرالى قازاقستان مۇسىلماندارى ءدىني باسقارماسى مەن پراۆوسلاۆيە شىركەۋى ءتيىستى ءپاتۋا مەن ەسكەرتۋلەر ازىرلەدى. سونىمەن بىرگە، مينيستر كوروناۆيرۋس ينفەكسياسىنان كەشە قايتىس بولعان ايەل تۋرالى پىكىر ءبىلدىردى.

«بىزدەن تاڭەرتەڭ قايتىس بولعان ايەلدىڭ دياگنوزىن نەگە كەشكە حابارلاعانىمىزدى سۇراپ جاتىر. ءولىمنىڭ ناقتى سەبەبى كەشكى ۋاقىتتا عانا انىقتالدى جانە تەز ارادا بۇقارالىق اقپارات قۇرالدارىنا حابارلاندى»، - دەدى د. ابايەۆ.

ايتا كەتەيىك، كوروناۆيرۋس ينفەكسياسىمەن نۇر- سۇلتان قالاسى بويىنشا 60 ادام، الماتى قالاسىندا - 48 ادام، قاراعاندى قالاسىندا – 4، جامبىل وبلىسىندا -3 ادام، اتىراۋ وبلىسى - 3 ادام، شىمكەنت قالاسىندا - 2 ادام، الماتى وبلىسىندا - 1 ادام، اقتوبە وبلىسىندا - 1 ادام، سولتۇستىك قازاقستان وبلىسىندا - 1 ادام، اقمولا وبلىسىندا - 1 ادام، پاۆلودار وبلىسىندا - 1 ادام، جالپى 125 ناۋقاس تىركەلدى. بۇعان دەيىن داۋرەن ابايەۆ كارانتين رەجيمى كۇشەيتىلگەن كەزدەگى كوشەدە ءجۇرۋ تالاپتارىن تۇسىندىرگەن ەدى.