قاجەت بولسا كوروناۆيرۋستان ەمدەلەتىن قوسىمشا ستاتسيونار جاساقتالادى - ساۋلە قيسىقوۆا

نۇر- سۇلتان. قازاقپارات - نۇر- سۇلتان قالاسىنىڭ قوعامدىق دەنساۋلىق ساقتاۋ باعدارلاماسى كوروناۆيرۋس ينفەكسياسىن جۇقتىرعاندار كوبەيگەن جاعدايدا اۋراحانالاردا قوسىمشا توسەك- ورىن ازىرلەيدى.

«جاياۋ جۇرگىنشى جولدارى، ايالدامالار، بازارلار - بارلىق جەردە دەزينفەكتسيالىق رەجيم كۇشەيتىلىپ، قولعا جاعاتىن سۇيىقتىقتار قويىلۋدا. قالامىزدا دەزينفەكتسيالىق قۇرالدار جەتكىلىكتى كولەمدە بار»، - دەدى باسقارما باسشىسى «حابار 24» تەلەارناسىندا وتكەن بريفينگتە.

ونىڭ ايتۋىنشا، بارلىق مەديتسينالىق نىسانداردا كارانتين جاريالانىپ، ازاماتتارعا مەديتسينالىق ماسكا تاعۋ مىندەتتەلگەن. «كوروناۆيرۋس ينفەكتسياسىن جۇقتىرعان نەمەسە جرۆي، وكپە قابىنۋ بەلگىلەرىمەن تۇسكەن ناۋقاستارعا مەديتسينالىق كومەك كورسەتۋ ءۇشىن جەتكىلىكتى كولەمدە توسەك- ورىن جابدىقتالدى. قاجەت بولعان جاعدايدا، قوسىمشا توسەك- ورىن ءبولىپ، ستاتسيونارلار ۇيىمداستىرۋعا دايىنبىز»، - دەدى س. قيسىقوۆا.

سونىمەن بىرگە، سپيكەر كوروناۆيرۋستىق ينفەكتسيا انىقتالعان جاعدايدا جۇرگىزىلەتىن شارالار تۋرالى ايتىپ بەردى. «ناۋقاس پەن ونىڭ وتباسى، ءبىر اۋماقتا تۇرعاندار جانە جۇمىس بابىمەن جاقىن بايلانىسقان ادامدار بىردەن وقشاۋلانىپ، اۋرۋحاناعا جاتقىزىلادى»، - دەدى ساۋلە قيسىقوۆا.

ايتا كەتەيىك، قازاقستان رەسپۋبليكاسى اۋماعىندا كوروناۆيرۋس ينفەكسياسىن جۇقتىرعان جالپى 109 ناۋقاس تىركەلدى. نۇر- سۇلتان قالاسىندا 61 ادامدا كورونوۆيرۋس ينفەكسياسى انىقتالدى. الماتى قالاسىندا - 40 ادام، شىمكەنت قالاسىندا - 2 ادام، قاراعاندى قالاسىندا – 2، الماتى، اقتوبە، جامبىل، سولتۇستىك قازاقستان وبلىستارىندا - 1 ادامنان تىركەلگەن. بۇعان دەيىن باسقارما باسشىسى نۇر- سۇلتاندا ءتورت ناۋقاستىڭ جاعدايى اۋىر ەكەنىن مالىمدەگەن بولاتىن.

اۆتور: ايجان سەرىكجان قىزى