تۇركيالىق ءانشى ابايدىڭ انىنە كليپ ءتۇسىردى
مەرەيتوي اياسىندا تۇركيالىق ءانشى ايبەن ەرسوي ابايدىڭ ءانىن شىرقاپ، كليپ ءتۇسىردى، دەپ حابارلايدى قازاقپارات.
«بيىلعى ماۋسىم ايىندا قازاقستاننىڭ استاناسىندا قازاق دوستارىمىزدىڭ ۇلى اقىنى ابايدىڭ 175 جىلدىعى قۇرمەتىنە فەستيۆال ۇيىمداستىرۋ جوسپارلانعان ەدى. شارت بويىنشا، ءاربىر ەلدەن كەلگەن قاتىسۋشىلار ۇلى اقىننىڭ ءبىر ءانىن شىرقاۋى كەرەك ەدى. ءبىز دە ابايدىڭ «كوزىمنىڭ قاراسى» اتتى تۋىندىسىن زاماناۋي ارانجيروۆكادا ازىرلەدىك. وتكەن اپتادا ىستانبۇلدىڭ ەڭ كورىكتى جەرلەرىنىڭ ءبىرى - سۇلتان احمەت مەشىتى ماڭىندا كليپ تۇسىردىك. وكىنىشكە قاراي، قاۋىپتى ۆيرۋستىڭ تارالۋىنا بايلانىستى بۇل جوبا توقتاتىلدى. الايدا ءبىز باستاعان ءىسىمىزدى اياقتاپ، تۋىندىنى سىزدەرمەن ءبولىسۋدى ءجون كوردىك»، - دەپ جازدى تۇركيالىق ءانشى Instagram-داعى پاراقشاسىندا.
سونىمەن بىرگە، ءانشى قازاقپارات تىلشىسىنە بەرگەن سۇحباتىندا قازاق انىمەن قالاي تانىسقانىن ايتىپ بەردى.
«قازاقستانعا ءتۇرلى جوبالار بويىنشا بىرنەشە رەت بارعانمىن. Qazaqstan ارناسى وتكىزگەن «Silk Way Star» بايقاۋىنىڭ قازىلار القاسىنا مۇشە بولدىم. بۇل كەرەمەت جوبا بولدى. وندا تەك كامەرا الدىندا عانا ەمەس، ساحنا سىرتىندا دا باۋىرلارىممەن ۇمىتىلماس ساتتەر وتكىزدىم. سول كەزدەرى قازاق مۋزىكاسىن ەستىپ، ءبىزدىڭ حالىق اندەرىمەن ۇقساس ەكەنىن اڭعاردىم. قازاق مۋزىكاسىمەن تانىسقان كۇنى ەكى حالىققا دا وسى سەزىمدى جەتكىزىپ، ەرتەدەن ۇلان-عايىر اۋماقتا تامىرىمىزدىڭ ورتاق بولعانىن ەسكە سالعىم كەلدى.
«كوزىمنىڭ قاراسى» دا العاش ەستىگەن ساتتە-اق جۇرەگىمە جەتتى. باستاپقىدا سوزدەردى تۇسىنبەسەم دە، ءاننىڭ نە تۋرالى ەكەنىن سەزىنگەندەيمىن. سوندىقتان مەن ءۇشىن ابايدىڭ وسى ءانىنىڭ ورنى بولەك»، - دەدى ا. ەرسوي.
قازىر ايبەن حانىم قازاقستان سىندى وزگە دە باۋىرلاس حالىقتاردىڭ ۇلتتىق اندەرىمەن تانىسۋعا مۇمكىندىك بەرەتىن جوبالاردى جوسپارلاپ ءجۇر.
«ءبىزدىڭ الەم اينالامىزداعى نارسەنى تەز وزگەرتىپ جاتقانىنا قاراماستان، ءبىزدىڭ ىشىمىزدە وتە قۇندى نەگىز بار. ءبىز - كۇن سايىن ءوزىمىزدى جاڭا دەڭگەيگە كوتەرەتىپ، ۇزدىكسىز داميتىن جاراتىلىسپىز جانە كۇن سايىن ءوزىمىزدى جاڭا قىرىمىزدان تانيمىز. جاڭا باعىتقا ۇمتىلا وتىرىپ، ءبىز اباي سياقتى قۇندى نەگىزدەردى بولاشاققا جەتكىزۋىمىز كەرەك. اباي سىندى تۇلعالار الەمدى جاقسىلىققا باستاۋ ءۇشىن تۋادى. الەمدەگى بەيبىتشىلىك پەن ماحاببات ءۇشىن ۇلى اقىننىڭ مەرەيتويىمەن قۇتتىقتايمىن»، - دەدى ايبەن ەرسوي.
اۆتور: ايجان سەرىكجان قىزى